大廚煮得又Talk得

旅遊發展局搞嘅「美食之最大賞」今年搞搞新意思，參賽廚師除了要鬥煮功，還要鬥口才，喺評判面前介紹自己菜式，講吓材料用法，仲要憶述入廚歷，考起唔少人。

比賽分「豬」、「蛋」、「腸粉」和「蟹」四組，要有原創性和在有限時間內發揮食材最佳鮮味，有些菜式講究賣相，擺碟用去不少時間，便要犧牲食物入口溫度，所以大廚們忙得滿頭大汗。

 

要大廚講嘢呢個挑戰，看來比煮嘢食難度更高。在「蟹」的一組，來評判面前「面試」的大廚，都是幾十歲大男人，一個二個竟手心冒汗說得期期艾艾，有些老師傅講不到半分鐘便出現「dead air」；有的見完評判後拍晒心口，直言「嘩原來咁多人，好驚。」

同西廚唔同，傳統中菜廚師大部分只在廚房煮呀煮，好少會出來面對客人，不過時移世易，食肆要搞新意思，都希望個廚能同客人講吓食經。

其實大廚們對食的知識都很熟悉，只是見不慣這種場面，未能暢所欲言。黃金海岸酒店陳國富師傅特別有急才，因為佢設計嘅「鴛鴦銀絲回味蟹」得到最多評判畀分。有評判就挑戰佢，問如果唔係比賽的話，平日在酒店是否同一個選料及味道時，他腦筋急轉彎笑說：「不如今晚請大家去我們酒店，試吓咪知道。」獲得評判一致讚賞。佢道菜除了以最高分數奪得「至高榮譽金獎」，仲攞埋「至Like廚師」獎項（下圖），可說雙喜臨門！

旅發局其實是想喺比賽中揀蟀，搵一些對食材熟悉口才又好嘅大廚，幫手推廣香港美食。看來參賽嘅食肆，喺下一屆要訓練多幾個「煮得又Talk得」嘅食神至得。

講番呢道菜，重點不是蟹，而是吸滿蟹汁的粉絲。陳師傅破格用中、日兩種粉絲，加日本年糕，再混和蟹子，令味蕾感受唔同層次，相當有創意。