推陶君行出戰補選 毓民想唔玩
過年前白姐姐日日去私人會所游水，每次游十幾個塘，又去做「電激」舒筋活絡，為挑戰毓民積極操fit體能（詳見今期本刊B冊）。
白姐姐說今次出戰並非想爭立法會議席，而是要拉毓民落馬。繼致函廉署及警隊一哥後，她即將展開虎年第一擊，就是去旺角街頭派十萬張傳單，標題是「反『黃賭毒』」，睇真啲原來係「反對『黃』毓民的『賭』仔性格『毒』害港人！」夠晒啜核。
佢玩得過癮，但最後可能好失落，因為有消息傳出，說毓民在內部強烈建議由陶君行代替他，參加九龍西補選，而佢老哥就退居幕後，全力幫陶仔上位。
何解毓民有此部署？背後有乜盤算？線人指出，建制派今次唔落叠，拒玩五區公投遊戲，毓民估計投票率必然偏低，社民連邊個出馬都一定贏，既然係咁，佢就冇必要親自披甲上陣，不如利用呢個機會力谷陶君行參賽，幫佢提早晉身立法會，先做兩年議員學吓嘢，亦可提高知名 度，二○一二年再出戰時贏面就好大。
毓民計過條數，兩年後自己再參選，有十成機會奪回一席，如果陶君行又成功連任，社民連在立法會便佔多個位，加埋其他「青年軍」，分分鐘由現時三席擴大到五席，咁就勁啦！
毓民（右）強烈建議由他力捧的陶君行（中）代他出戰九西補選。白姐姐近日積極操fit挑戰毓民（右小圖），如毓民唔玩，她會好失落。
白姐姐冇對手會好失落
線人話，毓民認為呢套想法十分高明，正大力說服陶仔上馬轉戰九龍西，但陶仔卻有保留，因為佢一直在九龍東扎根，幾年來落咗好多工夫，如果今次在九龍西補選入局，工作重點必會「西移」，兩年後要返九龍東競選便困難好多。佢為此十五十六，至今仍未決定。
長毛在內部提出一個更「激」意見，就是三個大佬（長毛、毓民及陳偉業）都不參賽，索性派三個新人出馬，日後一個唔該「三變六」，實力立即倍增。但黨內兄弟是否同意咁做，仲有排討論。
對白姐姐而言，如果冇咗毓民做對手，一定十分冇癮，多數會收band唔玩。佢同本刊記者講：「如果對手唔係毓民，就冇意思啦，我出嚟參賽只不過想挑戰毓民啫，對個議席冇興趣。」毓民考慮不出賽，白姐姐認為並非戰略部署，而係忌佢。「我一出手指佢欠債，佢立刻入稟法院封我嘴，到我寫信畀廉署及警方，佢亦縮埋冇反應，變咗隻害羞小白兔。最近又傳出話佢唔選，睇嚟係避開唔敢同我打呢場『黃白大戰』！」
究竟實情係咪咁，只有毓民自己知道。
余若薇爭做校董 政治爭鬥帶入中大
中大校董會有一個議席由立法會議員互選產生，今屆當選嘅係毓民，但佢老哥辭咗議員一職，校董個位亦要換人。
代表會計界的陳茂波（下圖），是中大校友，好想為母校做吓嘢，所以毓民個位一騰空，佢就報名參加互選，睇嚟機會幾大。
本來議員過往對中大校董個位冇乜興趣，張文光「捱義氣」做咗幾年，但最近形勢變咗，出任中大校董可以爭取某些學生及校友支持，增加政治籌碼，所以余若薇最近攔途殺出，又話想競逐校董個位，兩人勢必在二月二十六日之內務會議有一番較量。
一位中大師兄擔心如余若薇加入中大校董會，會將政治爭鬥帶入校園。「最近學生會班激進學生，以及自命為『反對派』專挑剔校政嘅少數校友，開始為余若薇造勢，想推佢做校董，如果成功，將來就可以裏應外合，將政治爭鬥帶入校董會，咁就會扭曲校董會嘅正常功能。」
事實上一批校友好唔想校董會政治化，認為陳茂波個人較務實，政治色彩少好多，是出任校董嘅適當人選，所以正醞釀聯名支持陳茂波做呢個位。睇嚟兩股力量的角力將會白熱化。
鬍鬚曾頻晤電影人 與陳可辛把酒論戲
鬍鬚曾做完通波仔之後，帶氧多咗，個人精神好好多，加上近日民調評分唔錯，心情甚靚。線人話，佢向來喜歡睇戲，亦好關心香港電影創作，因此近期數度約影圈有心人吃飯聚首，除了交誼，亦為佢哋打吓氣。
本刊記者上周發現鬍鬚曾在灣仔君悅酒店同發哥食飯，原來佢剛睇完《孔子》，想同發哥交流吓心得。
據知鬍鬚曾早前亦與一批電影人聚餐，其中包括導演陳可辛及吳君如。陳大導最新作品《十月圍城》，鬍鬚曾已一睹為快，覺得套戲功力甚高，所以食飯時同陳大導暢談戲經，又與君如講吓演技，十分融洽。
鬍鬚曾這類飯局極之低調，唔想令人覺得佢做公關騷。事實上佢個性謙謙君子，講藝術亦講得幾嘴，大家有共同話題，同一眾電影人好傾得埋。
