夏日熱辣辣，香港地想搵個地方避吓暑都難，一班星爸星媽為咗幫子女消暑降溫，實行帶他們來個夏水禮，一個二個B仔B女着上泳衣、戴埋黑超、攬住水泡萌到爆，人仔細細已相當吸睛！

周汶錡囝囝 無敵基因

到讀書先講「要贏在起跑線」？太遲喇！未夠一歲嘅周汶錡囝囝Jacques，單論個樣已經贏人一大截，集模媽同法國籍爹哋嘅靚爆基因於一身，得天獨厚不在話下，仲好有運動細胞，識得腳撐撐攬住個水泡仔游水，睇相都好有動感，贏晒！

鄭希怡囡囡 人氣爆燈

鄭希怡早前帶一歲大嘅囡囡梁浸浸去泰國度假，着上比堅尼嘅梁浸浸，簡直得意到震，鄭希怡仲幫囡囡喺網上開咗個粉絲專頁，喪po她的萌照，人氣高企。無計啦，梁浸浸咁得人鍾意，睇咗好難唔like啫！

陳君宜囝囝 戶外教學

家有金叵羅，管教都別有一套，「點心代表」老闆娘陳君宜就實行嚟個戶外教學，早前同一歲零三個月大嘅囝囝Ayden去淺水灣學游水，一向大膽嘅Ayden，滑過雪又玩過保齡球，游水又點會難到佢？話咁易就唔使媽媽喺側面傍住都識游，叻仔！