天后，下一站⋯⋯ 李玟
內地音樂節目《我是歌手4》，由第一季開始就紅到街知巷聞，不但捧紅了不少歌手，就連現年四十一歲的李玟（Coco），亦因這個節目再創事業高峰，奪得首個非內地「歌王」冠軍寶座。
「我已經經歷咗人生兩個二十，好多人覺得一個女藝人，當你四十歲時，you are done（你已經完結）！唔會再有咩改變，但其實我仲可以突破， The age doesn’t hold us back（年齡不會阻擋我們），我好相信『YOLO』（you only live once）呢句說話，我哋只會活一次，我唔想畀自己後悔，一定要做到最好！我腦入面，無『隨便』呢兩個字！」
成功非僥倖，李玟為自己帶來天后殊榮，下一站，再由天后出發！
李玟贏得《我是歌手4》，成為首個非內地歌手的冠軍，公布賽果一刻，她喜上眉梢（下圖）。
台下廿年功
相約李玟做訪問，已經是今年年初的事，那時她剛參加《我是歌手4》，還未知賽果，其後得悉她奪冠，我也為她感到高興。「嗰日我返到香港，本來想低調同屋企人食飯，點知我一落飛機， 所有工作人員見到我都向我拍手，我覺得自己好似打完仗返嚟嘅士兵咁，好感動！」
於多輪比賽中，李玟連續四次拿下第一位，冠軍寶座根本志在必得，不過她稱壓力大到一度想放棄比賽。「壓力比我想像中嚴重好多！我從來無諗過會贏，第一集我喺八個歌手入面攞第六名，對我打擊好大，返到屋企喊到黐線，有幾次都同自己講，點解要參加呢個比賽？壓力大到我瞓唔到覺、唔食嘢、唔休息，愈嚟愈瘦⋯⋯所以初初老公都好反對我參加比賽，因為佢知我係個好忘我嘅人！」
首輪賽果已定，但比賽仍然要繼續，李玟決定順着觀眾喜好，成功來個大逆轉。「呢個騷真係唔係人人都適合參加，就算你好唱得，都仲要好識表演，而且要接受到好多人對你嘅批評。有好幾個歌手都同我講，本身覺得自己好識唱歌，但嚟到呢個舞台，會成日質疑自己係咪好差，不停要喺贏同輸之間徘徊，完全預計唔到結果。」
的確，賽果不似預期，李玟揮低對手成為冠軍，但另一香港天后容祖兒，卻第一個被踢出局，令人跌晒眼鏡。「我都好shocked（震驚），之後我都有去安慰祖兒，同佢講佢表現得咁好，已經贏咗每一個人嘅心！」
入行二十二年，李玟深明「台上一分鐘，台下十年功」的道理，為贏取觀眾芳心，她不惜花巨資於置裝費上。「你（表演）得嗰五分鐘，要人buy你，梗係要着得好睇啲，令人留下深刻印象。我花咗好多錢喺表演服裝上，其中一次我唱 〈Bad Romance〉，出場時我着住件黑色斗篷，只會出現十五秒，但我為咗呢十五秒，足足搞咗十日，買唔同嘅布料去試，要make sure塊布要飄得靚，出場時要夠瀟灑。我做任何嘢都唔會偷懶，腦入面無『隨便』呢兩個字！」
去年老公為她舉辦四十歲生日派對，特別訂造三層高的星星蛋糕：「今年生日咁啱參加緊比賽，Bruce本來話太忙，唔嚟長沙睇我比賽，但最後佢帶咗兩個蛋糕畀surprise我。」
