情迷小鮮肉 歐陽妙芝做「出軌」人妻
人妻要追尋夢想,要比一般女性付出雙倍努力。名模歐陽妙芝與丈夫方時俊結婚後,盡心盡力照顧兩個兒子,「捱」到他們現已分別11歲和8歲,她終於可以做番自己,踏上尋夢之旅!
兩年前她開始去學音樂,更膽粗粗學作曲、填詞,早前經韓籍好友穿針引線下,更自資飛去當地拍MV,跟28歲的「小鮮肉」扮演小夫妻,奉旨「出軌」在牀上溫馨、鴛鴦共浴,還投入得自度親熱鏡頭,「我問導演使唔使加埋kiss鏡頭,佢話唔使,留番下次先。」
如此瞓身,小心畀老公扭耳仔喎!
原本MV的劇情是兩人一前一後攬住嬉水,不過浴缸實在太細,只好各據一方,傾偈、浸浴及看書!
浴缸嬉水
歐陽妙芝一向是哈韓族,有機會一嘗拍韓國MV當女主角,當然份外開心。她的韓籍好友得知她有意將自作自唱的歌拍成MV,即為她安排當地有名的攝製隊進行拍攝。
男主角由妙芝親自揀選,她睇中6呎4吋高的「小鮮肉」李楨煥,跟她扮演新婚夫婦,「我唔怕畀人話似姐弟戀,愛情無年齡界限,同佢一齊好似搵番初戀咁。可能佢做開舞台劇,帶到我入戲,完全零壓力。」
媽媽級的妙芝,跟「小鮮肉」很入戲,於MV中在牀上「纏綿」,又穿上tube top與對方擠在浴缸內,看似大膽,實情是得啖笑。「原本我同佢前後攬住坐喺浴缸裏面,不過個浴缸太細唔夠位,我哋只可以面對面坐⋯⋯有一場我真空着白恤衫,好似好性感咁,其實我貼咗乳貼。我做model嘅,露唔到三點就OK。」
劇情講到妙芝受「小鮮肉」冷待,穿上透視白恤衫的她,喊住隊紅酒。
戲中,「小鮮肉」表現得溫柔體貼,相當專業!
唱作媽媽
妙芝對製作成本,三緘其口。「唔好講幾多錢啦!好多朋友都話好想聽我作嘅歌,我就索性拍MV畀佢哋睇。之前我怕畀人笑,都掙扎過o架,但我想為自己嘅人生,做一件鍾意嘅事,唔理世俗嘅眼光。」
妙芝見兩個兒子漸大,在兩年前重拾興趣,在張崇基的音樂學校學鋼琴,又在老師的鼓勵下嘗試做唱作人,處女作是〈愛一世〉,MV的歌名則叫〈褪〉,內容講一對夫妻濃情轉淡,字字心酸。她感慨說:「愛情係好難保鮮,我有幾個朋友聽到首歌,都即刻喊咗出來。我老公有睇過MV,話首歌旋律好聽,但唔認同啲歌詞,佢話要作番首男版囉。我o依家作緊第三首歌,會同阿仔一齊唱。我無諗住做歌手,未夠高水準,自己enjoy吓咋。」自得其樂,正是妙芝最享受之處!