食得潮食得濠
短trip去澳門，梗係要對自己好啲，搵食唔可以冇要求！今次「Paco巨星飯堂」嘅嘉賓許志安，就「反客為主」，帶隊去到位於澳門羅馬街嘅「天潮」，介紹最新最hip嘅「食點」。
為暑假cult作《兇手還未睡》孭飛嘅安仔，因為另一半而愛上潮州美食，有佢帶路，仲唔係信心保證？
我同安仔過大海，去到位於澳門嘅高級食府「天潮」，品嘗與別不同嘅潮州菜。
安仔話餐廳係佢每次去澳門嘅必到熱點，係佢向我推介菜式，夠晒熟路。
必到熱點
安仔不時去澳門開show，而今次介紹嘅餐廳，原來係佢嘅飯堂。「通常做完show都會慶功，我上次開show後，先去咗官方嘅慶功宴，之後我自己私人搞嘅慶功，就係嚟呢度食。
「我鍾意食潮州菜，傳統打冷我係OK嘅，喺香港我都有食；嚟到澳門就少啲，因為之前冇乜選擇，但係o依家就有得揀！我已經介紹咗畀好多朋友，之後我諗我會同埋屋企人（Sammi）嚟食。」
哈哈哈！呢個新嘅「星蒲點」，安仔仲話：「試吓新派潮食同埋一啲fusion菜，唔使獨沽一味咁悶吖嘛。」
潮式鵝片紙米卷（$68/例），將傳統潮州鵝片糅合粵菜嘅紙米卷，match出火花！
潮式凍紅蟹（時價），係精選味道最鮮美、約重二十至四十両嘅紅蟹炮製，鮮甜爽口
金牌蜜汁叉燒（$68/例），肉質軟嫩多汁。
心儀潮食
安仔愛上潮食，其實同愛妻Sammi大有關係。「因為佢係潮州人，所以潮州菜係我哋經常會食嘅菜式，有時去佢娘家食飯，都會有啲潮州菜，好似鹹菜豬肚湯嗰啲。我好鍾意飲呢個湯o架，夠下火吖嘛！不過工序就繁複啲，少啲心機都唔得。」
潮州菜以外，安仔仲大談甜蜜外遊嘅首要「條件」。「梗係搵好食嘅餐廳啦！通常我哋去旅行，都會做定晒research，睇晒邊啲係值得去嘅餐廳，去邊間就係互想遷就吓啦，冇乜特定嘅模式。」
歌唱事業以外，今年安仔（左）再涉足影壇，同Janice Man及林家棟等，喺電影《兇手還未睡》中鬥戲。
安仔同Sammi低調恩愛，甜蜜外遊如是，廚房情趣亦如是，真係羨煞旁人。
多年來安仔同我並肩作戰，我哋既係親密戰友，亦係知心酒腳，確實難得。
餐廳老闆Candy姐熱情招待我同安仔，加上有水準嘅菜式，我哋點會唔畀Like？
再戰影壇
講到工作，安仔就大把計劃，「今年喺唱歌事業上都keep住上，我最興奮嘅係，再次有自己擔綱嘅電影上映，而且呢部電影係我繼《藍煙火》之後，喺呢十六年嚟，第一部由我做男主角嘅電影。我好鍾意部戲嘅劇本，好有character，唔係一般嘅主流商業電影。」
要睇安仔嘅新戲，就要等到暑假，但係我要同安仔豪食暢飲，就唔使等！即刻就得！乾！
乾煎糖醋麵（$128/例）係潮州經典菜式，外脆內軟，層次感豐富。
天潮片皮烤鴨（$388/隻），用餐廳嘅掛爐炮製，皮脆肉嫩。
川貝南杏燉鷓鴣（$138/例），落足料燉四小時，火候十足。
黑松露泡A5和牛粒（$438/例），牛肉嘅油花分布均勻，結合黑松露嘅甘香，perfect！
玉簪金腿鮮蝦球（$298/例），蝦球嘅鮮香同火腿嘅惹味出奇地夾，絕對要試。
潮州翻砂芋（$98/例）係另一個潮式經典，芋頭同糖霜嘅融合，最講究工夫。
冰花燉金絲燕窩（$398/位），啖啖燕窩，清潤養顏。
