夢如人生 快樂永記取 盧國沾
「夢如人生，快樂永記取……」盧國沾於七七年為薰妮填的〈每當變幻時〉中，如是寫道。
關於沾Sir，九十後的人應該感到很陌生，又或是只知道他是七、八十年代寫歌詞的，而事實上，當年沾Sir跟黃霑及鄭國江，是香港樂壇鼎足而立的三大詞人，情況就如今天的林夕、黃偉文和周耀輝。
沾Sir的填詞生涯雖然只有十多年，不算長，但作品卻逾三千首，加上從前的他對外牙尖嘴利，所以人們都稱他為「牙擦沾」，要不是九○年他曾於浴室跌倒昏迷，從此手腳活動能力有限的話，相信其作品應該不難過萬。
一代才子，因意外被迫隱世，再見江湖，外人聽起來也許會戥他欷歔，然而今天他為七月舉行的作品演唱會，在家中接受訪問，即使起身坐下、行出行入，亦要靠拐杖、靠輪椅，甚至靠太太全天候廿四小時貼身服侍，已屆六十八歲的他，卻仍不失招積，無論是說起當年的威水史，還是那場浴室意外，他都付諸笑談中，不時又跟同樣嘴gel gel的盧太互窒，哈哈哈哈又過了一個下午。
「佢專搞爛gag，正一『爛gag王』嚟o架！」他看着盧太說。
「佢直情當我係奴隸o架，見到個杯冇水，淨係識得呱呱叫：『冇水呀！斟啲水畀我呀！』你話我係咪似足奴隸先？」在旁的盧太乘機向大家公開投訴。
所以，與其說這是沾Sir作品騷的宣傳訪問，實情更是這對老夫老妻多年相處的一個點滴記錄。
盧全能
讀中大新聞系的沾Sir，六八年便加入了無綫宣傳部工作。「我負責佢哋官方刊物嘅電影介紹，睇完啲粵語片、國語片，就寫套戲講乜。嗰陣啲電影有張叫『本事』嘅紙，裏面有主題曲嘅歌詞同曲譜，我就貪玩咁填啲字，讀啲音出嚟，睇吓啱唔啱音囉。填詞呢樣嘢，冇人教我o架！」說罷，他展露出一個得戚的笑容。
七五年，一名監製在公司巧遇他，多口問他有沒有膽量為主題曲填詞。「我最憎啲人問我『夠唔夠膽？』我實話得o架！哈哈哈！」結果，他填了第一首作品：伍衛國主演的《巫山盟》同名主題曲。「呢首歌之後，我就愈寫愈多，啲人知道都會走嚟問我：『乜你識寫歌詞o架？』我都答：『咁點呀？』哈哈哈！」
那個時候，他正值血氣方剛，在公司完成了工作後，便跑到報館為一位負笈澳洲的老友做替工，放工回到家，和太太吃過消夜，睡三小時，便開始通宵寫詞。「所以嗰陣啲人都叫我做『盧全能』，哈哈哈！」旁邊的盧太忍不住插嘴：「佢嗰陣一日要食三包煙，仲要飲十幾杯咖啡，夜晚都一定要三杯，我親手煲嘅，然後就咁樣寫到天光，又返TVB。」
沾Sir的家裏，牆上或飯廳一隅，也擺滿了他填詞得來的獎項，十分當眼，可見他仍回味那段吒咤詞界的年代。
牙擦沾
七七年，已是宣傳部負責人的他，與周梁淑怡、葉潔馨、劉天賜、林旭華和石少鳴，齊齊由無綫跳槽到佳視，報章雜誌均稱他們做「六君子」。「我係宣傳總監，日日都要同出面講呢件事，啲記者話我好牙擦，就叫咗我做『牙擦沾』，哈哈哈！」
翌年，佳視倒閉，他去了廣告公司工作，但填詞，他還是未停過。「嗰陣黎小田直情嚟我公司搵我，我就由〈變色龍〉開始幫麗的寫主題曲啲詞，跟住蕭若元、麥當雄佢哋個個監製都搵我寫，寫寫吓，佢哋就叫埋我去麗的幫手。」
那時，他一晚最少可以寫一首歌，產量多得令他與黃霑及鄭國江，成了香港樂壇填詞界三位巨頭。「鄭國江好少露面，我喺電視台餐廳見過佢，都有走去打招呼。黃霑呢，我喺（廣告）公司嘅部門有個同事叫林燕妮，黃霑就時時上嚟搵佢傾偈，哈哈，我就係咁樣識佢嘅。」
問到他跟合作過的歌手可有甚麼趣事，沾Sir忽然落晒閘：「冇喎，我同佢哋唔熟。」盧太即勞氣地說：「好心你唔好話乜嘢唔熟啦，（張）德蘭嗰啲咪熟囉！薰妮咪熟囉！一傾就四個鐘頭！甄妮你都熟啦，佢住竹林苑，你住慧景臺，佢打個電話嚟，你好快就過咗去，成日傾歌詞，一傾又好多個鐘！」
（左起）顧嘉煇、黃霑、沾Sir和鄭國江，都是七、八十年代香港樂壇歌曲創作的雄霸。
