收入大減《愛‧回家》舊班底增值自救
隨着《愛‧回家》第二輯圓滿結束，劇中「See See Fitness」一眾「員工」也各奔前程。其中「瑜伽導師阿嫻」陳潔玲、「Billy哥」何君誠，以及「健身教練Henry」魏焌皓，雖然仍有獲安排客串新劇集和當節目主持，但畢竟工作量和收入大減，三人惟有另謀生計自救。
假戲真做的陳潔玲，正努力考取瑜伽導師牌，準備開班授徒打好基礎；正修讀遊艇駕駛課程的何君誠，計劃攞正牌揸船；至於早已擁有健身教練牌的魏焌皓，則努力操肌，勢保其四十吋胸膛，以備隨時再執教鞭，自己做生招牌。
陳潔玲雖然只學了瑜伽一年多，但已經玩上癮，她正準備考導師牌執教。
陳潔玲考瑜伽導師牌
在《愛》劇中飾演瑜伽導師「阿嫻」的陳潔玲，本身已學習瑜伽年多。「我嗰陣因為拍《激優一族》（青少年資訊節目）接觸到瑜伽，跟住就鍾意咗呢個運動。」雖然她有份參演新劇《來自喵喵星的妳》，但為興趣也為自我增值，近日便花了三萬多元修讀瑜伽導師課程。「考完之後，我會教啲私人嘅班先，不過我更加想教長者做瑜伽。」
由於她報讀的課程，若要考牌，便要先學足二百小時瑜伽，故她每星期也會上兩、三堂，每堂一小時的瑜伽班。日前她到尖沙咀上課，做了一字馬、倒吊等多款空中瑜伽動作，對她來說似乎毫無難度，照計考牌亦能應付自如吧！
「考瑜伽導師牌，唔係淨係做動作咁簡單，因為考試分兩個試，一個係哲學嘅考試，要考筆試同做一啲難度比較高嘅瑜伽動作。之後仲要考一個核心試，即係要熟識瑜伽最基本嗰二十六個式子，喺考場教一個模擬瑜伽班。考試之外，其實我仲要交一啲功課，例如設計一啲唔同嘅課程出嚟，好似減肥瑜伽課程、改善都市病嘅瑜伽課程咁。」
在導師輔助下，陳潔玲每次做瑜伽前也會先拉筋。
在《愛‧回家》中，陳潔玲（右）飾演的「阿嫻」，善良又迷信，性格甚可愛。
魏焌皓攞正牌教爆肌
「健身教練Henry」魏焌皓，現實中原來早於一二年已考取健身教練牌。「去考牌，我主要係想畀自己一個認同，考咗之後，我都有做過教練幫補家計，收一千蚊一個鐘。」
經過多年健身，魏焌皓既考取了健身教練牌，更由一百二十磅的瘦削身形，鍛煉成一百六十磅、四十吋胸的爆肌body。
當下他的四十吋巨胸爆肌身形，已成了標記，全靠日子有功。「我初入行時得百二磅、廿三吋腰，太瘦，就的起心肝練大隻，操咗幾年，見有啲成績，我就報讀教練課程，除咗要學點樣去用啲健身器械，同點教啲學員用之外，仲要學埋人體結構、肌肉名稱同位置，指出邊啲動作會令學員容易受傷，因為考牌要考埋筆試。」
考牌後，操肌仍然是他重要的生活部分，健身室仍然成了他第二個家。「如果時間許可，我一個禮拜操到六日，每次玩到三個鐘，全身動作都會做。因為我大隻咗之後，真係多咗演出機會，好似《飛虎》呢類劇，都好需要身形健碩嘅演員去做。而且，我都好希望將來可以開間健身中心，有錢賺又可以寓工作於興趣！」
努力操肌外，他亦會配合飲食。「我一日五餐，少食多餐，七分飽；又飲蛋白質奶粉，食淨雞胸嘅海南雞飯。」
