還看騷眉
Soulmate，即係心靈伴侶，係可遇不可求嘅「人生奢侈品」；取其諧音，香港人就會稱之為「蘇眉」或「騷眉」，盡顯港式幽默。而兩位金像級人馬：王菀之（Ivana）同白只，就以此為題材，喺即將公演嘅舞台劇《騷眉勿擾》中合作，將心靈伴侶無限放大。
我誠邀兩位主角擔任今次「Paco巨星飯堂」嘅嘉賓，仲帶佢哋去到位於新蒲崗嘅「PHO 會安」，品嘗特色嘅越南風味，細說積極籌備新作嘅點滴。
我帶白只同Ivana去到位於新蒲崗嘅「PHO 會安」，品嘗越式滋味，暢談佢哋即將公演嘅舞台劇《騷眉勿擾》嘅準備工作。
白只同Ivana相識多年，今次嘅舞台劇係佢哋去年向對方許下嘅承諾，大可拭目以待二人喺舞台上擦出嘅火花。
兌現承諾
兩位應屆同前屆嘅金像獎雙料得主（最佳新演員及最佳男/女配角），原來一早認識，Ivana話：「我係白只嘅粉絲，佢做舞台劇好得！所以上年我已經同佢講，希望可以同佢合作做一次舞台劇。」
白只即刻話：「所以我哋知對方有期，就睇吓有咩好嘅劇本，o依家呢個嘅可發揮性好強，戲路亦都好啱我哋，係一個喜劇嚟嘅，我覺得可以發放到正能量畀入場嘅觀眾。」
講到故事，Ivana表示：「我喺部劇入面係一個顧客，而白只就係一個按摩師，我哋就係喺每一次四十五分鐘嘅section入面交流，發現到對方係自己嘅soulmate。」
言下之意，即係台上會出現按摩期間嘅畫面，究竟佢哋嘅present手法係點？我真係好好奇！白只話：「唔會係極之香艷嗰隻嘅，我哋嘅重點係放喺對白上面，走幽默路線，仲要係貼地嘅，咁觀眾睇到先會有共鳴。」
北越蒸粉包（$52），味道清淡，加上醬汁就變得惹味，風味百變。
柚子鮮蝦豬肉沙律（$68），夠晒開胃。
越南胡椒蟹（$238），蟹肉鮮甜，配上有風格嘅胡椒，夾得啱啱好。
除咗海報上見到嘅兩位主角，舞台劇仲有演藝學院出身嘅楊偉倫（下圖）參演，佢係白只所屬樂隊「朱凌凌」成員之一，主角們對呢位拍檔都讚不絕口。
三人火花
舞台劇講求同觀眾嘅即時互動，對於兩位有豐富經驗嘅主角，梗係唔使擔心，而且白只仲特別去「考察」，務求更投入按摩師一角。「我不嬲都係骨精嚟嘅，成日都有做腳底按摩，當知道要演一個按摩師，就問多啲啲師傅問題，好似按啲咩位會有咩功效嗰啲，我都有搵Ivana實習吓o架。」
Ivana就分享自己按摩嘅親身經歷：「可能我平時彈琴彈得多，搞到啲肩頸位好實，直情係史上最實！我試過喺按摩中心搵師傅幫我按，按完之後個姐姐叫我下次唔好再搵佢，哈哈！佢已經係好夠力水嗰啲師傅，我見佢一邊按我，一邊係咁抹汗，佢真係出晒力！」
哈哈哈！藉着按摩帶出soulmate，兩位主角仲有特別推介，白只表示：「就係劇入面另一位演員『阿卵』嘞，佢同我一樣都係演藝學院嘅師兄弟，亦係我隊band『朱凌凌』嘅成員。佢演戲嘅喜感同掌握節奏都勁堅，真係要特別留意！」
為預祝佢哋Good Show，我特別預備咗一個豆腐黑芝麻蛋糕，為兩位主角注入能量。
為咗更貼地去演繹按摩師角色，白只攞正牌去按摩考察，Ivana仲大讚拍檔好手勢。
雖然Ivana自稱對甜食冇特別喜好，但面對豆腐蛋糕，連佢都食指大動。
入廚秘技
雖然Ivana嘅工作繁忙，但係已為人妻嘅佢，依然享受入廚之樂。「最近我嘅拿手菜係日式照燒雞扒！唔好以為好難整，其實煮日式嘢，只要有一支日本豉油同埋一支味醂，基本上就已經冇問題。我鍾意睇人煮嘢食，亦都鍾意自己煮，不過煮嘅步驟太繁複的話，就唔係好啱我。」
白只就鮮有親自下廚，「睇我嘅身形就知我乜都食，特別係澱粉質，粥粉麵飯一定唔少得！」
哈哈哈！咁我就率先以澱粉質——蛋糕，預祝兩位Good Show！
蒜茸牛油雞翼（$52），香脆可口。
脆炸鮮蝦餅（$59），外脆內清甜，極具層次。
椰青金沙骨（$88），啖啖椰青香味，相當特別。
越南春卷（$58），外層脆卜卜，內裏啖啖肉。
美國頂級生牛肉河粉（$88），河粉由越南直送，夠晒地道。
