為選九東炒大鑊 譚香文退出人力倒戈

政黨成員為爭出選立法會拗到反目時有發生，但好似人力嘅譚香文同「快必」譚得志咁，搞到最後有人拉大隊憤然退黨，就幾罕見。

話說該黨早已流傳快必會出選九東，譚香文二、三月又喺黨內whatsapp群組表明想出戰這區，據消息人士說：「譚香文話自己在人力好多年，好多街坊想佢再戰立法會。而且佢假假哋都係當區區議員，有一定票源，出選九東理所當然。」快必就同黨友講既然佢要選，就喺執委會四月底表決時爭過，「快必話如果佢有民主素養，就應該大大方方一齊公平競爭。」消息人士說。

譚香文（左三）同快必（左二）為爭出選九東互不相讓，最後譚香文拉大隊退出人力。

「雙譚相爭」喺黨內角力近一個月，撐譚香文嘅人力副主席兼前綫召集人甄燊港，四月六號突然喺群組發訊息指，佢及譚香文等四名前綫成員決意退出人力。「雖然佢無解釋退黨原因，但大家都知係因為講唔掂數。」無幾耐之後，再傳出譚香文退出埋前綫，盛傳佢會回巢公民黨再戰立法會。

本刊致電譚香文，佢助理承認譚香文已經退出人力及前綫，暫時未諗過返公民黨。但有傳佢用自由身幫九東立法會候選人助選，換言之即係幫人砌快必，政治嘅嘢，就係咁現實。