不要低頭，光環會掉下來 鄭欣宜
訪問這天，鄭欣宜在坐滿食客的餐廳內，對着鏡頭大擺甫士，食客們個個猶如看表演般睇到眼甘甘，可是當事人欣宜自己，卻如置身無人之境，隨意扭動着身體，轉換不同的表情，無憂無慮，表現自然、自信又自在。
我忽然看到她背後彷彿長期打了back light，整個人多了一層光芒圍着她——大概，阿Y黃偉文（Wyman）就是看到她這層光采，才會有了「不要低頭，光環會掉下來」這兩句歌詞，才會有了〈女神〉這首歌。
「有晚佢喺我屋企食飯，忽然同我講，要將我變成女神，我話：『唔係呀嘛？咪講笑啦你！』哈哈哈！然後佢話佢已經諗到其中兩句歌詞，就係『不要低頭，光環會掉下來』，我好有感覺。
「我真係好鍾意阿Y！佢由（填）〈你瘦夠了嗎？〉到〈分手是常識吧〉，到o依家呢首〈女神〉，都改變緊我嘅生命。」
畢竟，欣宜活了這廿九個年頭以來，一直也未停過被外界抨擊，不是藐她靠父母庇蔭，就是嘲笑她的外形、外貌，由眾矢之的，蛻變成今天的女神，當中的身經百戰，她感受至深。如果每個人也擁有自己的光環的話，欣宜這道光環，比很多人更得來不易。
「我以前曾經好用力想去話畀大家聽，我唔係咁咁咁！但o依家，我決定做番我自己，人哋嘅抨擊，其實唔緊要！」
說時，我發覺她原來還多了一份傲氣。
吔屎咩？
欣宜說，對〈女神〉的歌詞，她很有感覺，而且很有啟發。「我哋日日揭開報紙、雜誌，都會見到『女神BB』邊個邊個，『男神BB』邊個邊個，但真真正正可以fit到『女神』或者『男神』嘅人，又有幾多個呢？我諗全香港最多都係得嗰五個percent嘅人先做得到囉，咁另外嗰九十五個percent嘅人？即係我哋呢啲咁，又點呢？粗俗啲講句……」她即靠近手機的錄音咪字正腔圓地說：「咁、我、哋、吔、屎、咩？」
而這首歌，正正就是告訴那九十五個percent的人，即使不是外界公認的女神、男神，也不值得「吔屎」。「我哋每個人天生出嚟，就已經有自己嘅皇冠，已經係着住最靚嘅晚裝，只係被外界嘅聲音遮蓋咗，我哋先會愈嚟愈睇唔到咋嘛。後來我又發覺，其實嗰五個percent嘅女神、男神都應該要聽，因為一個人就算幾perfect，都會有自信心低落嘅時候。」
把「女神」定義重新設定，連帶她的同名新專輯唱片封套也甚玩嘢，大頭女神look的她，疑似正在撩鼻哥。「呢個idea咁得意，其實我只係想證明畀大家睇，我個鼻係冇造到（整容）o架！同埋我個鼻哥窿，係大到可以將成隻食指塞咗入去都得嘅！」但見她講解時顯得特別冷靜，但在旁的各人此時已笑到翻天！
同名新專輯，封套以撩鼻女神look亮相，告訴大家，所謂「女神」，查實都不過是會食飯去廁所撩鼻哥的人。
跟導演莊少榮合作執導拍〈女神〉MV，她找來幾位好友當主角，又親手製皇冠為各「女神」加冕，「呢首歌太有意義，拍嗰陣我喊咗幾粒鐘！」
做乜啫？
因為父母是鄭少秋和肥姐沈殿霞，欣宜甫出世便成為了公眾人物，一舉一動皆可隨時惹來閒言閒語，甚至嘲笑謾罵。「通常都係嗰兩款：肥啦、靠父母啦。呢啲攻擊，喺我十幾歲嗰陣，受得最多、最密同最大！」
日子有功，她今天對這些抨擊很多時都已處之泰然。「如果我嗰日心情冇乜嘢，睇到呢啲，咪會覺得『唉，好冇新意呀！』但有時EQ低、特別攰，或者好大壓力嘅時候，我睇到呢啲嘢都仲會有啲忟憎（皺着眉頭說）：『做乜啫？』咁我都係人嚟o架嘛！」
而且，也不是沒有底線的。「話我肥、靠父母，呢啲我可以冇所謂，但話我唔pro，我好hurto架！一個人背後為自己嘅工作做咗幾多嘢，外面係永遠唔會知囉！不過呢樣都未致於最嬲，試過有人話我係『敗家女』，話我阿媽『死不冥目，見到個女咁乜乜乜』呢句好嬲呀！即係無論你點鬧我都冇問題，你唔好講我媽咪囉！呢啲真係好hurt！」
阿Y黃偉文去年初寫下〈你瘦夠了嗎？〉後，欣宜說：「佢嘅歌詞，一直改變緊我嘅人生觀。」
好乸攰？
她坦承，從前曾試過因為這些抨擊，刻意改變自己，例如由二百幾磅的身形，減到百多磅。「由day1決定減肥開始，都好多struggle，到最後好瘦嗰陣，明明應該好滿意，但我反而唔鍾意望鏡。
「跟住我怕大家覺得我認為自己好正，試過夾硬剪短頭髮，夾硬每次行出嚟，都着西裝褸、中性化啲，但係咁樣，我好乸攰！真係好攰！最慘係，就算做咗，好似都冇乜反應，哈哈哈！又唔會特別多咗job喎！哈哈哈！咁做嚟做乜啫？」
吃力不討好，欣宜索性選擇做番自己。「其實我細個時已經明白：連劉德華都會有人唔鍾意o架啦，咁我呢啲small potato又算係乜啫？一百個人裏面，冇可能一百個人都like你o架！
「我成日都有句金句就係：『船到橋頭自然直，煮到埋嚟就要食』，無論啲人點話你，你都要繼續向前行o架啦，咁佢哋點都要咁講、咁睇你嘅，自己咪要接受佢哋係咁睇自己囉！人生太短暫，我唔會再嘥我嘅時間，去please人哋！」
