「香港2020」搬竇 傳陳方安生失魅力
前政務司司長陳方安生牽頭成立嘅議政平台「香港2020」,一三年開檔時招攬唔少猛人加入,仲請埋民主黨前立法會議員李永達做研究總監。但近年「香港2020」無聲氣,最近仲「大屋搬細屋」,李永達亦已離任,甚至有傳「香港2020」面臨「摺埋」威脅。
本刊曾到過「香港2020」在銅鑼灣嘅舊址和灣仔嘅新辦事處,發現舊址已交吉,正在裝修;新址則大門深鎖,水牌只寫陳方安生的英文名字「Anson Chan」,未見「香港2020」字樣。
政壇中人指,「香港2020」除了網站外,現在連屬於自己的辦公室都無,幾乎係「名存實亡」。更有消息指,兩、三個月前「香港2020」的金主見陳太在政壇影響力不復再,決定「閂水喉」,所以組織要慳住使。至於李永達係聞到燶味跳船,抑或因為「縮皮」被炒,本刊聯絡過李永達,佢就話唔評論。陳太發言人回應cut人傳聞時指,政改方案被否決,「香港2020」唔使咁多人做嘢,而搬辦事處係因業主要收番單位。