學民散檔分身家　黃之鋒被轟政棍

一一年反國教運動中一夜成名嘅「學民思潮」，周日宣布正式「解散」，成員拆夥一半跟黃之鋒、周庭、林淳軒等人過檔新政黨，準備九月參選；其餘成員就跟學民現任召集人黃子悅成立新嘅學生組織，專注推廣學界公民教育。

坊間嘅焦點係學民嘅資產去向。黃之鋒話拆檔後，抽七十萬撥入新學生組織，七十五萬則會用作成立法律基金，支援日後被捕嘅學生，新政黨一毫子都無。但據學民中人透露，黃之鋒原本打算撥一百二十萬元入新政黨做競選經費，其餘先畀新嘅學生組織，可惜事前走漏風聲，遭網民狂插做法等同呃錢，佢才逼不得意放棄呢塊肥豬肉。

黃之鋒被踢爆後改變做法，但仍被網民狂轟。有曾捐款的網民說：「唔明點解捐了給學民的錢，可以無故轉去其他組織？黃之鋒將公款當是私產，根本係cap水行為，同政棍無分別。」有網民甚至提議成立「學民苦主大聯盟」，集體追討捐款。

學民思潮周日宣布摺埋，另組新政黨及新學生組織，外界指此舉純粹是黃之鋒為組黨參選立法會的政治決定。（張恩偉攝）

學民解散的消息一出，網民即提出各種質疑，批評黃之鋒等人藉此將捐款調走，做法如同「政棍」。

學民成立短短五年幾，經歷數次內訌，被喻為「軍師」的張秀賢（右一）及黎汶洛（左一）皆已退出，核心成員走得七七八八。

學民風光一時，如今樹倒猢猻散，創辦人之一鍾曉晴話今日之果，早有前因。佢話成立學民本來只係想反國教，講好成功咗就會解散，亦唔會參政和參與其他政治議題，但黃之鋒一二年反口令學民逐漸變質，鍾曉晴之後拉大隊退出咗，「近年學民好似暴發戶，大量招收成員，內部溝通不足，削弱對學生議題的關注。」

有前成員亦透露，一四年另一創辦人林朗彥退出時，內部已四分五裂，「一派只想專注為學生發聲，另一派就想跟黃之鋒從政出位，最近的新界東補選，成員對支持六號定七號亦有唔少爭拗，結果逼走了黎汶洛。」

他指黃之鋒等人違背學民成立時的初衷，最終成為散檔的導火線，「好多成員都認為學民半隻腳涉足政壇洗濕個頭，好難再行落去。學民今屆唔派人選立法會，就會被本土派邊緣化，若然落選，亦代表已脫離民意，所以一定要贏到議席，學民先有出路。權衡過後，不如散檔。」

如今黃之鋒跟學聯羅冠聰、黎汶洛另組政黨，他形容亦是盡地一煲之舉，「黃之鋒最有號召力卻未夠秤參選，只能幫羅冠聰同黎汶洛抬橋，講真牌面未打已輸了一半，如果最終落選，一切都會玩完。」