49歲黎明 自創廁所男神論
秉承向來金句水準，最近活躍於facebook的黎明（Leon），一段「鍾意就鍾意，唔鍾意就唔鍾意，唔好講乜嘢L、I、K、E！」的短片，令網民l、i、k、e爆！
為慶祝入行三十年，Leon下月底至五月初將於中環海濱舉行全港首個4D演唱會，日前接受本刊訪問時，問到他個唱可會有4D金句，他笑着說：「可能係……（忽然碌大雙眼）『睇真啲』咁囉！哈哈哈！」
表現親民到咁，難怪四十九歲的他，現在寧願秒殺網民，點都唔認自己是男神。「神點會喺人面前出現？（男神）呢啲梗係貼（相）喺牀頭，貼（相）喺廁所o架啦！」
「金句王」果然是「金句王」。
下月舉行4D個唱，加上近期活躍於facebook，「金句王」黎明獲網民勁l、i、k、e，「我都唔知點解係『金句』，咁有冇『銀句』、『銅句』呢？」
冷血的木頭
黎明下月底舉行的演唱會，名字很長，叫「黎明Leon 30th Anniversary Random Love Songs 4D in Live 2016」，顧名思義，主要賣點，就是4D。「我哋會喺中環海濱起一個室內場館，有冷氣，有surround sound，有好多好多visual mapping，仲會有味道，同埋飛啲唔知乜嘢出嚟，所有嘢都係無中生有，哈哈！」
而另一個賣點，則是個唱的排舞老師。「個排舞老師係絕頂嘅，因為係我自己！啲dancers會跟番我跳，我唔會跟佢哋。演唱會一定要有啲動作，唔會零，咁會太過分！你唔郁，人哋會覺得你冷血，我唔會做冷血嘅木頭，我點都會排番幾隻舞！」
可是作為A Music老闆的Leon日理萬機，還要為個唱練歌，仲夠時間排舞？「我辛苦唔緊要，做到冇所謂。有時個天份只能夠做到嗰部分，就無謂再強求，你夾硬嚟，觀眾覺得你辛苦，都會睇得唔舒服啦！」咁……即係有時間排舞嗎？「最緊要係我冇問題咋嘛，唔代表綵排得多就冇問題o架。歌，我（造詣）冇退步過；衫嗰啲，都會有嘅。」
本月初，他於facebook上載了何謂4D效果短片。「係我特登叫人整嘅，因為有啲人真係唔知乜嘢叫4D。」
上周一（14日），Leon（紅圈）以香港影視娛樂大使身份，與財政司司長曾俊華（中）等，為香港影視博覽主持啟動儀式。
凡人睇緣份
查實，以Leon的魅力，即使他在台上只表演齋企，也應該可以吸引到很多忠實粉絲來捧場，畢竟他已當了三十年男神。「我點會係男神呢？我o依家都响你面前，神點會喺人面前出現？（男神）呢啲梗係貼（相）喺牀頭，貼（相）喺廁所架啦！」
OK，咁作為凡人，都不能只有工作，沒有感情生活啊！「冇感情，唔講得；有感情，遲啲啱嘅時候先講，唔啱時候就唔講，唔講就最好，見到啲（狗仔隊）車少啲。」但張學友和劉德華也有下一代了，「呢分鐘我冇諗過（要小朋友）。」咁有冇擇偶條件先？「冇乜條件，睇緣份。」
即是如其中一句金句所言：「有冇機會拍拖，就同見鬼一樣，都係要講緣份」？他笑了笑，說了一個大家可能要努力參透一下的答案：「有機會見到咪見到囉，冇機會見到咪見唔到囉！你明唔明呀？大家都要創新o架嘛，我哋以前香港有午夜場，午夜場之後就有子夜場；但內地，包飛都冇人睇嘅，叫『幽靈場』，即係搵鬼笨呀！哈哈哈！」
Leon強調，於中環海濱舉行演唱會，最希望予觀眾有個美好回憶。「呢個場地遲啲交番畀政府之後，唔知會用嚟起乜嘢，冇o架啦！」
原來facebook係咁用嘅…
