羅嘉良冧爆港太

日前，朝早六點幾，東姑都未瞓醒，就出發去深圳嘅寶安機場準備旅行。食早餐時，發現隔籬枱有位戴帽兼戴黑超嘅型男，當然望多兩眼啦！原來係多年冇拍港劇嘅羅嘉良（撈家），東姑記得，佢最後一齣參演嘅劇集係〇九年無綫台慶劇《富貴門》。

現時撈家一直喺北京居住同大陸拍劇，但係無綫監製黃偉聲夠牙力，成功搵到佢回巢拍新劇《與諜同謀》，總共二十集，約需兩至三個月拍攝。

趁住拍攝空檔，撈家就趕返北京慰妻。現場所見，當佢一坐低，就火速叫咗一碗麵同兩款點心；又趁啲嘢食未到，撈家就同老婆玩WeChat 。期間，有位港太上前要求合照，撈家雖然睡眼惺忪，但係見到香港粉絲，即刻熱情起身，捉住港太嘅手講多謝，搞到港太開心到見牙唔見眼。講真，呢個年代已經好少有咁熱情嘅明星，東姑真係要喺度畀個Like佢。

未開始食嘢，撈家就起勢咁同老婆玩WeChat，真係廿四孝老公。

趁住拍無綫新劇有空檔，撈家趕返北京慰藉老婆蘇岩。

呢名港太見到撈家好似蟻嬲蜜糖咁，而撈家亦即刻熱情咁起身，捉住港太隻手影合照。