名人行善，最簡單是搞ball賣枱籌款，但九巴後人雷禮權太太利蘊珍（Marie），早前為所成立的「運動燃希望基金」搞籌款晚會，卻請來基金界猛人謝納新（Nissim）打擂台籌款，以真‧運動來帶出背後的意義。

利蘊珍是天生運動狂，一天若不運動已慘過被蛇咬，「我每日至少做兩、三個鐘運動，早、午各做一項，當中包括游水、 打tennis、踩單車、做gym、打boxing，對我嚟講運動就好似刷牙、洗面咁，係每日基本動作。」

而五十六歲依舊愛打拳的謝納新，同樣熱愛運動，「做運動同做人、讀書一樣，畀人打到受傷倒下，痛到死死吓，都要有勇氣企番起身，同人再砌過。」

兩個運動狂人走在一起，連籌款活動都充滿魄力。

利蘊珍和謝納新同樣是超級運動癡，運動影響他們一生，利蘊珍說：「做運動嘅人會好尊重人，唔會睇人級數。」謝納新認同說：「運動唔會分階級，我哋嘅仔女對人都唔會分階級，唔會睇少人。」

利蘊珍熱愛運動，老公雷禮權和一對子女都受她影響，即使假期出埠也愛到陽光與海灘的地方，方便一家人齊齊出海暢泳。

絲綢之路踏單車

相約利蘊珍和謝納新在拳館做訪問，二人卻沒有穿上運動服飾，拍照時你一言，我一語：「講做運動唔一定要着運動衫打boxing，拍攝只係其次，最重要係講吓我哋個『奧夢成真』計劃，我哋同奧委會合作咗五年，由六間中學到o依家十八間中學受惠，全部運動課程由世界級退役運動員教學，令班學生參加到唔同嘅比賽，有機會贏獎。」

她旗下的「運動燃希望基金」，單單在去年已與「利希慎基金」等，為該計劃提供一千六百多萬元的贊助，她說：「個基金係私人成立，靠自己畀錢同親友支持。」

利蘊珍生長在運動之家，自小吸收運動的養份成長。爺爺利希慎熱愛打網球，當年常與利蘊珍父親利孝和於每個周末呼朋喚友打波，而利孝和夫人利陸雁群則每日修練易筋經和游泳，一年三百六十五日風雨不改在家中的凍水泳池練水。五年前，利蘊珍為了替基金籌款，在四十多度高溫下，用三日時間由伊朗踏單車穿越絲綢之路到新疆，挑戰個人極限，耐力驚人，「我踩咗四百幾公里，踩到邊瞓到邊。」

利蘊珍五年前為基金籌款，由零開始學踩單車，夥拍三項鐵人奧運代表李致和、女鐵人陳樂怡等，在四十多度高溫下，用三日時間極速由伊朗穿越絲綢之路，「我覺得人係無極限，最重要係抱有積極正面嘅心態，勇敢面對失敗，失敗咗要企番起身，想辦法去解決問題。」

她領略到運動的好處，亦以運動去鍛鍊兒子雷正揚和女兒雷正殷的意志，兒子八歲已被她訓練打網球，她更專登揀烈日當空的正午開波，唔曬唔打，「o依家啲父母太保護仔女，只會害咗佢哋，我帶個仔喺最艱辛嘅情況下接受訓練，佢習慣咗就唔覺辛苦。我同佢比賽，一定出盡全力打贏佢，佢直至十三歲至第一次贏到我。」

那對女兒會否疼惜一點呢？她想了一想說：「個女係音樂家，無得同個仔比較，但用運動訓練佢哋好有效，除咗有玩嘅元素，亦令佢哋充滿正能量，唔怕失敗。」

至於丈夫雷禮權同樣愛動，亦敢於挑戰新運動，利蘊珍笑說：「佢鍾意做gym，近排仲鍾意跳hip hop舞。」