唐文龍雞啄唔斷

九四年，以歌手身分入行嘅唐文龍（Michael），曾經喺台灣發展過；憑住高大、俊朗嘅外型，被TVB睇中，收歸旗下。喺唐文龍演繹過嘅角色當中，東姑就最like佢喺《十月初五的月光》飾演嘅金勝一角，好man呀！可惜未能夠令佢殺出重圍，之後，佢毅然離開TVB。

東姑記得喺〇八年，佢終於有自己嘅代表作，就係劇集《火蝴蝶》，可惜喺亞視播出，迴響一般；隨後，佢轉戰內地發展。

最近，唐文龍就同李連杰拍緊由陳嘉上執導嘅電影，日前，東姑趁佢由橫店返香港休息兩日，就捉住佢食飯，同場仲有李龍基同退休律師曾權威。唔好以為曾律師只係鍾意追女星，原來唐文龍都係佢偶像，佢兩個一坐低就雞啄唔斷，上至天氣，下至法律，乜都傾一餐。其實Michael咁型仔，東姑都想同佢集郵o架，不過見係曾律師，就冇計讓路啦！

李龍基自從同唐文龍拍完電視劇《火蝴蝶》之後，就再冇見過面，難得有機會聚首一堂，基哥立即飛撲埋去影番張合照。

唐文龍同曾權威律師已經有十年冇見，難得見面，當然有滔滔不絕嘅話題，唐文龍仲興奮到舉晒手。