時下流行「小鮮肉」，意指年紀輕且有煞食外型的嫩男。現年二十歲的湯鎮業孖仔湯君慈（Bruce）及湯君耀（Chris），亦打算加入此行列，為娛圈注入新血。

今年年底將於美國加州大學洛杉磯分校（UCLA）畢業的二人，未出道經已吸金力驚人，不但獲廣告商及製片商主動敲門，有指拍廣告酬勞更高達四十多萬。大孖湯君慈則謙虛表示：「無咁多，但（時薪）係有幾萬蚊！爹哋好想我哋入娛樂圈做明星，不過點都要完成晒學業先。佢想我哋讀演藝，學吓普通話同功夫，因為我同細佬都比較怕醜，學好基本功，第日對住鏡頭都無咁驚！」

識得鋪定後路，自然快人一步。

二人小時候經常被同學、老師認錯，坦言雙胞胎會有心靈感應，君慈說：「有時我心入面諗緊一首歌，細佬就即時哼咗出嚟，好奇怪，發生過三、四次。」

兩兄弟小時候愛與父親一同踢足球，父親更買了波衫給他們穿着，君慈（右）指：「我鍾意巴塞，細佬就鍾意皇馬。」

一四年，父親湯鎮業帶兩人出席內地綜藝節目《我不是明星》試水溫，為兒子入娛圈鋪定後路。

寡言嚴父

要與年輕人做訪問，識揀一定要去嘉年華一邊玩一邊做，一對孖仔更不忘帶同表弟李子熙三人行齊齊玩，立即引來不少途人目光。驟眼看上去，大孖湯君慈年輕力壯，當日寒風凜凜，仍堅持只穿一件短袖T恤，露出結實手臂；相反細孖湯君耀則戴著cap帽，表情嚴肅得多，「雖然我哋係雙胞胎，但我哋唔鍾意啲人覺得我哋好似，其實我哋性格同着衫style都唔一樣，多數都係我講嘢，細佬喺旁邊聽！」大孖搶着發言。

現於美國修讀社會學及電影的他們，與胞姐湯愛嘉同於美國洛杉磯生活，想與住在青島的父親見一次面，可說是很難。君慈直言：「我哋不嬲都好少見面，細個爹哋成日都要返大陸拍戲，一個月都係見得幾次。後來我哋升上中學，入咗聖士提反書院寄宿，星期一至五都喺學校，六、日先會返屋企，見面機會仲少。o依家我哋去咗美國，只得聖誕同暑假約爹哋喺香港聚會，一年只會見到一、兩次面。」

見面難，與父親傾談的次數﹐更加是少之又少，「爹哋一向好少講嘢，比較寡言，佢係屬於你唔搵佢，佢就唔搵你嘅人，不過佢都會關心我哋嘅學業同生活，得閒都會send whatsapp錄音嚟，但好多時（因為時差）都無法即時覆到佢，就連佢生日，都好多年無同佢一齊慶祝過！」

〇一年，湯鎮業與二人的母親、前亞視藝員姜坤離婚，從此三父子生活於同一屋簷下，君慈指，當時兩兄弟只有六歲，而且相當百厭，經常打架，父親分身不暇，愛以嚴厲方式管教。

「佢成日鬧我哋，幾乎無讚過我哋咁滯，乜嘢都鬧，例如我哋約佢食飯遲到少少，佢都會鬧得好厲害 。細個如果我哋讀書唔合格，又或者我哋打交，佢更會攞藤條打我哋隻手，仲試過攞（台灣牌）麻雀尺嚟打我哋。

「雖然我哋同爹哋一向唔會特別多嘢講，但關係依然好好，細個會一齊去踢足球，但o依家就唔會，因為佢老喇，哈哈！」