新官上任 康泰太子爺被挑機
康泰旅行社董事總經理黃進達上月初當選旅遊業議會主席，櫈都未坐暖，就要處理首個危機，向佢挑機嘅係自稱「佢Uncle」嘅旅遊從業員聯會會長林少麟。
旅議會規定內地旅行團必須到登記商戶「濕平」，否則就是違規，又在店舖當眼處貼海報以作識別。
黃進達（右）剛上任就遇到uncle狙擊，點樣擺平事件，絕對影響業界以至公眾對佢嘅印象。
唔知係咪新官上任三把火，旅議會在元旦日推出多項新措施監管業界，規定導遊要戴證、旅遊巴要貼「車頭牌」，又收緊定點購物指引，將《商品說明條例》納入其中，引起部分業界人士不滿。
由林少麟發起嘅「不合作運動」，就一於抵制監管措施，佢炮轟旅議會是「私人俱樂部，最好拆咗佢」；又揚言假如旅議會下周二（一月十二日）開會前唔回應，將帶至少六百人踩場示威，一場旅業內戰一觸即發。
林少麟又批評旅議會好心做壞事，「巡查員根本無權查人，我地有導遊一日畀人查四次，旅議會愈管全行生意愈差，由政府成立旅遊業監管局訂立清晰條例好過。」
林少麟（左二）話業界怨氣積壓多年，忍無可忍先發起今次「拯救行動」。
佢又話，定點購物指引涉嫌違反︽競爭條例︾，規定商戶要畀內地遊客半年退貨，更加係種族歧視，林少麟反問：「點解其他地方遊客得二十一日？最好梗係商戶自己決定。」他已分別向競爭事務委員會及平機會投訴，並兩度發律師信畀旅議會。
五十六歲的林少麟花名「平頭」，導遊出身入行四十年，目前在友利國際發展有限公司做顧問。據知佢同去年底發生打死內地遊客的D2珠寶店老闆鍾偉棠，有合作搞生意。佢哥哥林少石有兩間定點購物店，近日退出咗旅議會嘅登記冊。林少麟與旅行社東主協會會長葉慶寧關係友好，葉上月輸咗畀黃進達，做唔到旅議會主席。
今次高調向旅議會「挑機」，仲係新主席剛上場，但林少麟聲稱對黃進達冇咩意見，「睇住佢大，但呢個世姪，連少少危機管理意識都冇，到依家都冇搵uncle傾吓。」
作為﹁世姪﹂，黃進達選擇企硬，強調推行新監管措施前已作充分考慮，願意循正常途徑對話，而非「威脅、罔顧業界服務及利益，並用來做籌碼的態度」來溝通，但目前未收到林少麟嘅約見通知。面對「Uncle」老馬有火，提出發起罷工云云，看來今次風波未有咁快收科。
