現年六十五歲的樂壇校長譚詠麟，近年腰間多了一個大肚腩，更不時被人取笑。為了即將舉行的溫拿演唱會以及二○一六年的內地巡唱，阿倫去年十一月終於的起心肝準備keep fit，但又撞正接拍電影《江湖喜劇》，無奈要將消腩大計押後。

為了電影中時肥時瘦的「江湖大佬」造型，他連月來不時要由「肥倫」變「瘦倫」，每次轉造型都要靠「神奇吸腩大法」，用鏡頭來掩人耳目，更要勒緊褲頭「頂硬上」。

見到記者影相，阿倫立即施展「神奇吸腩大法」，挺胸收腹。

譚校長雖然近年肚腩常現，不過落場踼波依舊起勁，懶理巨腩環腰。

阿倫大方表示之前有試過一百五十磅，但近來體重已逐漸下降。

凍齡冇走樣

譚詠麟近日接拍了由林超榮執導、范振鋒監製的賀歲片《江湖喜劇》，片中阿倫飾演「江湖大佬」，與久未在大銀幕演出的戚美珍飾演夫婦。除了在片中扮搞笑「大佬」外，導演林超榮為勾起觀眾的集體回憶，更安排阿倫在戲中扮後生，重塑他當年的靚仔造型，當中一個造型更以唱片《愛情陷阱》封面為藍本，阿倫穿起昔日裝束完全無走樣，如凍齡一樣。

據工作人員透露：「校長為咗扮番廿五歲都幾辛苦，成日忍住度氣挺胸收腹拍足成場，一Take過好專業！導演叫收工，個肚先自動脹番！」

日前晚上七點半，阿倫與伍詠薇、陳小春、潘源良、雷有輝、鄧建明等到佐敦醉瓊樓為電影開工，當晚阿倫挺着肚腩準時到達化妝，半小時後換上黑色西裝以「肥倫」造型現身，影相時他就施展「神奇吸腩」大法，在大家面前挺胸收腹，證明自己不會逼爆西裝。

最緊要開心

其實阿倫早於去年十一月，已表明為了快將舉行的《溫拿演唱會2016》計劃減肥，加上即將在內地舉行巡唱，減腩已刻不容緩，但剛好遇上這次拍戲的造型，因而要延遲減腩大計，說到減肥狀況：

「之前都好似試過一百五十磅，呢排瘦番，個肚腩時有時無啦！我又冇乜話特別keep fit，頭先開工前成大班人開開心心食嘢，無乜特別戒口。平時都係同朋友打吓Golf，我成日都有去踢波！」

當晚來探班又曾被阿倫指「何文田肥珍」的戚美珍（三嫂）反而身形fit爆，保養得宜的三嫂說：「我都冇話特別保養，學阿倫成日講，做人最緊要保持心境開朗，心境青春好重要，平時我都係同三哥打吓golf做運動啦！」