劉鳴煒係乜乜乜

華人置業（127）主席劉鳴煒做咗新一代男神！佢日前與新晉演員游學修參與港台節目《我係乜乜乜》的「男神選舉」，二人坐喺布幕之後，由十三個女觀眾提問，由政見到點食情侶餐都問一餐，之後由女觀眾選出心目中嘅男神。

游學修答問題比較風趣幽默，大部份女仔本來都揀咗佢做男神，只得兩個女仔撐劉鳴煒，不過當布幕拉起，眾女見到竟然係華置嘅繼承人，一時間起了哄，十秒之內有七八個女仔轉軚撐劉鳴煒，令佢成功當選男神，場面相當搞笑，只見游學修尷尬地說：「估唔到你地竟喺我面前咁樣過檔。」仲一口咬定，佢同劉鳴煒嘅分別係一個窮，一個富。

節目係一個幾有趣嘅Blind Test，當睇唔到面貌身形背景只問口才，跟知道晒後可以係完全唔同嘅選擇，節目抵死之處係畀女仔轉軚，結果係無論男仔口才幾好，都不過係選揀條件之一，絕非唯一，這也是現實。

節目即時喺網上熱烈煲爆，好多人批評香港女仔現實亦拜金，口說愛情至上，但見到係富二代即時飛奔過去；也有女仔留言反擊，話唔係貪劉鳴煒有錢，而係佢相對成熟，另一個太仔，女仔自然鐘意男仔穩重可靠啲。不過講到尾，都係離唔開女仔揀對象睇錢。有人亦話，游學修人氣不足，如果係柳俊江或者伍家謙，應該有得鬥吓。

劉鳴煒被一眾港女選為男神。

筆者即時問鳴煒做男神有咩感覺，做乜咁有興趣參加呢真人騷，佢話純粹覺得好玩，估唔到咁大迴響，「其實問答完後我感覺到自己輸咗，但個布幕升起時，見得兩個女仔撐我，我有些驚訝，嘩乜十一比二咁大比數？不過佢地知道係我之後紛紛轉軚，就更驚訝。」他笑話，其中一個女仔將佢講成係一個好好嘅package，即係樣子學識背景一齊考慮，可能係咁贏，佢話調轉頭男揀女，亦一樣會睇樣貌學識性格背景。

佢覺得現代人愈來愈將愛情量化，將愛情與金錢對等，例如搞直昇機求婚之類以金錢堆砌嘅做法，佢唔太BUY。

作為富二代，當然知道有錢可以做好多野，但佢嘅作風一向唔係咁，佢之前同本刊做過個人專訪，都係穿普通中價牌子衫褲，食三文治做午餐。

問佢如果同女仔拍拖，最浪漫會做乜，佢就話形式唔重要，最緊要係誠意，有時趁午飯趕過去女友工作地方一齊食三文治，放假兩個人行吓公園，圖書館，或者一齊整吓野食，已夠開心的。

劉鳴煒做咗青年事務委員會主席後，無因為自己背景而堅離地，佢走出去同好多年青人交流，亦夠膽試新野，顯示佢係一個有心人。