踏入2016年，要為新一年定下大計、目標嘅同時，都唔好忽略身邊嘅人和事，繼續用愛看世界就最適合不過啦！咁啱今次「Paco巨星飯堂」嘅嘉賓：溫碧霞（Irene）同方皓玟，有份參與以愛為主題嘅電影《愛在深秋》嘅演出，電影即將上映，兩位美女自然興奮。

我就帶兩位嘉賓去到位於九龍城嘅「禾牛薈火煱館」，一邊品嘗有特色嘅火鍋，一邊細說愛嘅奇妙力量。

我帶Irene同方皓玟去到位於九龍城嘅「禾牛薈火煱館」，暢談即將喺1月21號上映嘅電影《愛在深秋》。

戲中Irene同譚耀文飾演一對夫妻，體現愛的威力。

首任監製

我首先要恭喜Irene！因為電影係佢首度擔任監製嘅作品，而身兼女主角嘅佢，仲憑電影入圍《澳門電影節》嘅「最佳女主角」，雖然未有得獎，但係佢嘅演技早已備受肯定，加上電影係佢花咗兩年嘅心血結晶，箇中嘅滿足感經已無可比擬。

「喺兩年前我就睇咗導演林家威所寫嘅劇本，嗰時咁啱係我想建立自己嘅電影工作室，於是我搵咗另一位編劇去重寫劇本，令劇本適合番中國人，就成為咗o依家上映嘅版本。

「用深秋作為故事背景，一方面因為我哋開拍嘅時候係秋天，另一方面係因為我好鍾意呢個季節，覺得秋天係好浪漫，好適合拍愛情故事。我哋喺桂林取景，拍出嚟嘅效果好靚。」

今次Irene大膽起用新導演，佢解釋背後嘅原因：「好多新導演都好有potential，爭在有冇機會畀佢哋去發揮，好似趙薇咁，佢第一次做導演嘅《致青春》，就係有一個好機會畀佢。今次林家威都係，我覺得佢拍出嚟嘅故事，可以感動到人，呢點係好重要。」

健脾養顏椰子雞湯（$168），啱晒冬日滋補養生。

台式麻辣鍋（$158）係以台灣麻辣作參考，口味夠晒正宗。

刺身拼盤（大、$398），鮮味無比。

我同方皓玟早已結緣，心水清嘅佢仲特別買咗一支十六年嘅威士忌，作為我哋相識十六年嘅禮物，啱我嘅口味！

獲益良多

Irene加上男主角譚耀文，一睇就知係實力派嘅組合，資歷相對地較淺嘅方皓玟，就表示獲益良多。「收到劇本已經好開心！到見到阿譚同Irene，真係feel到企喺佢哋隔籬，聞吓陣味已經學到、吸收到好多嘢。我飾演嘅角色係好鍾意阿譚，開工之前我就特登睇咗阿譚好多戲，等自己迷上佢先去拍。」

哈哈哈！方皓玟為演出做足功課，去到現場嘅時候仲得到阿譚親授錦囊。「對住阿譚，我有咩唔識就好厚面皮咁問佢，佢直情會示範一次畀你睇。我最記得一幕講佢飲醉酒，又好掛住Irene，我就要送佢返屋企。我同阿譚嘅身高相差太遠，無論我着幾高嘅高踭鞋都好難就，佢就教我點樣去就位，好實用。」

身兼監製同女主角於一身嘅Irene，與方皓玟惺惺相惜，話題不絕。

Irene同方皓玟盛讚電影嘅男主角譚耀文，異口同聲表示阿譚係不可多得嘅好對手。

有心送禮

電影以外，方皓玟今晚仲有心地帶嚟一支十六年嘅威士忌，「眨吓眼，我同Paco你就識咗十六年，呢支酒係紀念禮物！」

我一向以酒會友，今次調轉角色一樣咁開心！而且今晚嘅火鍋仲合晒兩位嘉賓嘅心水。Irene話：「我好為食o架，sashimi、麻辣火鍋都係我嘅至愛，所以keep fit我都係以做運動為主，跑步係最有用嘅。」

方皓玟大表贊同：「因為我屋企人住台灣，所以我好鍾意麻辣鍋，個湯底靚就乜嘢配料都好食，最多食咗之後先再做運動burn番！」

本地手切肥牛（大、$278），係火鍋不能或缺嘅配料之一。

鮮吊桶仔（$68），爽口鮮甜。

松葉蟹皇包（$32/隻、兩隻起），啖啖蟹香，令Irene都要encore！

西班牙橡果黑毛豬肉片（$108），肉質嫩滑。

自家製法國鵝肝蝦丸（$98），外彈牙內juicy。

自家製餃子（$78），即係帶子雲吞蝦，正！

牛拼盤（$168）包括牛脷扣、牛胸爽及特級雪花肥牛粒，最啱嗜牛者。

禾牛薈火煱館
地址：九龍城南角道36號地下
電話：23839863

下期預告

帶一眾索模品嘗特色日本料理。