胡定欣 視后規格
感情得意,事業更得意嘅胡定欣,憑住《鬼同你OT》嘅姜蓉一角,揮低同劇嘅田蕊妮,以及「高登巴打」開晒咪力撐嘅汪明荃,喺今年嘅《萬千星輝頒獎典禮》中勇奪「最佳女主角」,不過,外界就盛傳佢加簽長約換獎。
榮升視后嘅胡定欣,身分地位自然係超然啲。日前,東姑去新劇《一屋老友記》探班,就見到全部藝人,包括:「收視福將」歐陽震華,長腳蟹呂慧儀同滕麗名,仲有一堆前輩一早到齊晒拍攝現場,胡定欣就調較至last minute,差唔多臨開機前至蒲頭。視后玩壓軸出場,咁先有氣勢o架喇,你懂的。
此外,今時唔同往日嘅胡定欣,除咗有貼身助手照顧之外,更有專業化妝師隨身服待。劇中飾演水電技工嘅佢,衣著當然要爛撻撻啲,之但係有化妝師執一執個樣,即時索爆,排場同靚樣都壓倒晒一眾女藝人。