電話騙案夠猖獗 林健鋒也中招
近期電話騙案愈來愈多，招數層出不窮，猖獗程度去到身邊似乎好多人幾乎都收過呢類電話，連政圈中人亦不可倖免，行政會議成員林健鋒最近分享一單篤爆騙案的經歷。
話說有一日，林太就喺屋企收到一個電話，對方不斷話「林生公司寄咗一個郵包過來，想問吓啲資料等」，林太覺得好奇怪，跟對方拖延時間，同時暗中致電林健鋒問清楚咩事，林健鋒話：「我從來唔會將公司郵包寄去屋企，又點會有人識打屋企電話，我即時意識呢個應係詐騙電話，冇再睬佢。」
據林健鋒講，佢平時已經有個習慣，一見「3」字頭的電話就cut線，但偶然仍會中招，試過有內地的電話號碼打來，聲稱係乜乜單位，問佢想唔想做政協，話有途徑可以幫佢搭路安排；對方「白撞」都可以撞到一個「真政協」，可以係巧合，亦反映呢類電話真係多到你唔信。
