蘿蔔糕後遺症！

農曆新年，普世歡騰，天天都有魚蝦蟹賭局，查實小妹玩魚蝦蟹永遠最高落注$20蚊，但永遠嗌得最大聲的一定是我，連好友都問：「你買好大呀？」「大嗱嗱$20蚊o架！玩氣氛啫！」我的而且確試過嗌到連管理員也要走上來㩒停我，因為有人投訴，真不好意思！

除了健康賭局，還有一些不太健康但非常重要的東西是新年不可缺的，就是年糕和蘿蔔糕了！這也是我的死穴！小妺一直都很嘴刁，年糕一定要吃華麗園的椰汁年糕及鴻星的正常年糕，還有重點蘿蔔糕，必定要吃八珍出品的！小妹食蘿蔔糕的份量真的很驚人，平常人吃蘿蔔糕是一片片吃的，而我是一底底「劈」的！非常恐怖！

每逢農曆年過後，我都會肥到隻豬咁，最衰係啲蘿蔔糕啦！

平時小妺的食量很少，有時全日無食過嘢都會唔記得！但一講到蘿蔔糕，一日最少食一底！記得上年新年，小妹年初二就已經要補倉了！家母問：「咁快食晒？初二咋喎！你又劈咗幾多呀？」「三底咋嘛。」「嘩！你小心變肥豬呀！」「新年流流無所謂啦！」（如果有劈蘿蔔糕比賽，我很有信心坐亞望冠呀！）

好，新年過後，一切回復平靜，除了自己的身形像有了五個月身紀般，真係肥到隻豬咁！大家都應該知道，做我們這行，是不能跟個「肥」字掛鈎的，於是，新年過後的創傷後遺症要發作了！五底蘿蔔糕的代價是，每天要在寒冷的冬天跑山，約Personal trainer練泰拳，還有針灸排毒！快馬加鞭！務求將那五底蘿蔔糕盡快「跑返出來！」

而小妹每次跑山時，都會一路埋怨：「點解啲蘿蔔糕咁好食？如果佢難食啲，我o依家就唔使跑得咁辛苦啦！」

大家有沒有試過八珍的蘿蔔糕呀？真係一發不可收拾o架！