主頁 > 專欄 > Paco巨星飯堂 > 天氣啱晒預期 2015 年 02 月 10 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

天氣啱晒預期

雖然即將歡度新歲，但天氣依然乍暖還寒，啱晒食火鍋。今日我帶兩位超級貴賓：我嘅好酒腳古仔（古天樂），同埋佢喺賀歲鉅獻《衝上雲霄》嘅好拍檔阿佘（佘詩曼），喺一個啱晒timing嘅情況下，去到位於灣仔嘅「金牌海鮮火鍋」。最top嘅嘉賓，品嘗最top嘅火鍋，暢談拍攝最top嘅電影時，鮮為人知嘅點滴。

今晚同古仔、阿佘兩位貴賓，去到「金牌海鮮火鍋」，品嘗最頂級嘅多元化火鍋，暢談《衝上雲霄》。

古仔（左二）同葉偉信（右二）多次合作，今次仲不時計劃性爆肚，捕捉阿佘嘅即時反應。

浪漫愛情掛帥

相信唔少人同我一樣，非常期待《衝上雲霄》喺2月19日上映，單睇poster上眾主角嘅造型，就覺得非常吸引。古仔率先解說：「今次係我同葉偉信（電影其中一位導演）合作以嚟，第一次以愛情掛帥嘅作品。雖然《葉問》有愛情線，但戲入面有講葉問對佢太太好情深；《倩女幽魂》又係有愛情線，但唔係重點。今次sell愛情之外，仲有3條線咁多，我覺得葉偉信拍情都好好，今次佢同鄒凱光仲用咗一個我覺得好嶄新嘅方法去拍，唔係亞洲電影一貫見到嘅風格，出嚟嘅效果好新鮮。」

古仔同葉偉信早已拍出默契，阿佘同兩位型男就係首次合作，佢話：「導演好nice，好用心去話畀我知佢要嘅嘢，特別係拍動作場面，講緊嘅只係飛機遇到氣流咋，佢都成個醒晒，親身示範。

以鹹菜豬肚鍋（$148）配上潮州紫菜（$38）同餐廳獨有嘅自製魚腐（$58），夠晒「潮」！

晚爐乳豬（$800）亦需預訂，原隻即燒，皮脆肉鬆化。

「古仔呢，其實初時同佢合作都有啲緊張，你知佢外形幾coolo架啦！但係合作耐咗，就會發現佢好細心同埋好識照顧人。」哈哈哈！我同古仔經常相約對飲，cool只係佢嘅外表，內裏嘅佢hot到不得了，好關心身邊人，無論對工作或朋友都充滿熱誠，今次拍攝佢又表現到出嚟。「今次個劇本其實每日都變緊，因為3條線相互影響，有時我唔使拍都去現場睇其他線嘅發展，再同導演、阿佘傾。

「不過，有好多時我只係同葉偉信、鄒凱光傾，因為我哋3個係男人，對我同阿佘呢條感情線，睇法有啲似，唔預先話畀阿佘知，就係要一個女性對呢段感情最真實嘅反應。」

臨近新正頭，不妨預訂呢一個潮州四喜拼盤（$840），「四喜」包括滷水鵝片、蝦棗、蟹棗及蘿蔔灌漿，包羅萬有。

捕捉即時反應

阿佘立即補充：「因為我同古仔喺戲入面嘅愛情係橫跨好多年，大家係對方嘅初戀，咁多年都好難捨難離。而佢同導演傾，喺對白或者情節上有啲小改動，都觸發到我有唔同嘅即時反應，我諗佢哋就係要我呢種自然嘅reaction。」

雖然古仔同阿佘今次係首度合作，但二人一入戲就擦出火花，令人期待。

摩天輪一幕係兩位主角最推介情節，咁入場就要加倍留意嘞！

兩位嘉賓不約而同表示，最難忘一場喺London Eye拍嘅「分手戲」。古仔話：「有一場喺摩天輪（London Eye）拍嘅戲，我同阿佘一句對白都冇，但我就因為屋企嘅問題要同佢分開。葉偉信同我講要表達一種刻骨銘心嘅痛，然後就叫我哋入車廂拍嘞。車廂比較窄，所以得我同阿佘同埋個cam man，兩個導演就喺另一個車廂睇mon。有時拍阿佘嗰陣，我偷睇到導演啲神情好興奮，就知道拍到佢哋要嘅嘢。」

阿佘就表示：「嗰場戲係我未拍就已經feel到嗰種痛，我記得拍嗰日係全日第一場戲，講我同古仔要分開，冇對白就只可以用眼神、動作去表達有幾傷心。個摩天輪轉咗3周半，導演先嗌cut，拍完我都要一陣去復原。」

瑤柱金魚餃（$58）以瑤柱同鮮蟹肉炮製，加上金魚外形，內外兼備。

吞拿魚大腹（$180）鮮香味美。

古仔Fit爆秘技

兩位專業演員就預咗會擦出火花，而古仔同阿佘嘅至fit figure，除咗係先天優勢，仲要後天努力去保持，古仔早已奉行少油少鹽少糖飲食。「好似今晚打邊爐，或者食日本料理，好多人鍾意點豉油又溝咩醬，食sashimi又吓吓點豉油，不知不覺間就吸收好多鹽分，即係鈉，對身體健康有好大影響。最簡單睇到嘅，係食完之後第二日，個人一瞓醒就好腫。年紀大咗，不論鹽分、糖分消化都冇咁快，所以我打邊爐同食日本嘢都絕少點豉油。」