陳倩瑩欠號召力 遊行慘淡收場
去年佔領運動後，泛民首個大型活動「二．一大遊行」周日上演，結果場面相當冷清，民陣自己數都係得一萬三千人，警方統計就得八千八百人。
有參與遊行民主派地區人士就話，民陣新召集人陳倩瑩的號召力喺今次遊行徹底現形。有知情者向本刊透露，陳倩瑩一班「學聯老鬼」，之前一直吹大數話最少有五萬人，點知畀警方「將軍」，要佢按人頭比例，交一百幾十個糾察出來維持秩序，可是冇政黨願意撥人手畀佢，陳倩瑩要拉雜成軍，四圍求救先勉強拉到一百人。
民陣周日遊行只得八千多人，人流疏落結果以「破紀錄」的時間，所有人不用四小時就由維園行到中環。
有搞過元旦大遊行的泛民老鬼就話，「遊行人數一向都係事後先作大，邊會咁蠢一早打開口牌話有幾多人參加，其中一個原因就係費事畀警方預先抽秤，要民陣搵足夠人手搞掂秩序。況且各黨較早時已講明，剛搞完佔領，大家都想唞唞，最好就暫停搞大遊行啦，連一月一日都唔搞，但陳倩瑩剛上位偏要展示『號召力』，結果好多政黨都唔響應，場面冷落係佢哋自己攞來。」
知情者說，之後陳倩瑩未諗清楚仲話民陣日後會考慮是否仍在「七．一」舉辦遊行，「搞錯呀，仲有半年，邊有人會咁亂講七．一唔準備遊行？」
