「袋住先」掀內鬥 李永達唔妥狄志遠
特區政府正進行第二輪政改方案諮詢，更吹風話可在方案上列明二二年修改特首選舉辦法，想泛民接受「袋住先」。泛民表面話決不接受，但內裏其實拗到火紅火綠，兄弟都幾乎反面；上星期民主黨兩名舊兄弟就因此反目。
事緣民主黨前幾任副主席狄志遠向外發表對政改最近睇法，認為中央好似放軟口風，暗示過咗今次政改，將來仍有改動空間，既然有咁嘅彈性，冇理由唔「袋住先」咁愚蠢。
不過，阿狄「袋住先」言論一出，民主黨急發聲明劃清界線，表示「他不代表黨」，跟住中常委李永達更發炮狂批，話阿狄言論令黨無法忍受、要研究革走佢嘅黨籍等等。有知情者話，阿達好似着晒火，喺黨內多次上綱上線話阿狄被共產黨收買。
「指控咁嚴重，狄志遠聽到亦發火反問阿達：『點批我都可以，點可以話我係共產黨？！』」與狄志遠稔熟的黨友話，阿狄淡出政圈好耐，本身亦好溫文好少咁火爆。
李永達（中）和狄志遠（左）昔日曾是創黨兄弟，但兩人隨後因派系鬥爭，愈走愈遠，如今再因政改之爭，幾乎形同陌路人。
知情者話，民主黨所有中委在向外發表言論一定要跟隨黨立場，但普通黨員言論空間則較為彈性，阿狄既然只係普通黨員，照理佢亦有佢嘅言論自由。
知情者解釋指，李永達狂批狄志遠，與黨內一班主流派長久以來不滿狄志遠以至一班匯點舊系有關。狄志遠前年曾講過國教不一定會「洗腦」，當時已引起黨內高層強烈不滿，「民主黨竟然召開『中紀委』會議紀檢狄志遠，想即場踢走佢，最終無實質證據佢言論有問題，但從此阿狄就被視為眼中釘。」知情者指，狄志遠一句說話，黨就動用到中紀委這把利刃，可見對狄志遠有多不滿。
知情者指，李永達等人一直都顧忌匯點殘餘勢力，「阿狄『袋住先』言論，其實喺黨內就有一批人支持，李永達發難，就係要㩒住呢啲聲，以免另類意見不斷發酵。」知情者說，
「阿達最近周圍同人講，已經修改過黨章，可以加快處理同黨立場不一致黨員的紀律，仲話阿狄夠膽『再做第二次』，一定會喺黨內動議停止狄志遠黨籍最少十二個月。」
本刊向狄志遠查詢，語帶不忿的他提出連串質問：「馬丁冇講過不同意見咩？又唔踢佢出黨？點解會因人而異？民主黨唔係很尊重言論空間咩？我係唔會自己退黨。」
