高學歷阿媽的委屈

有傳媒報道話新一代師奶，八個之中便有一個高學歷，引起一夥女人好大迴響。

好似幫本刊寫《港媽面書》專欄的潘澄，本來係運籌帷幄嘅大公司高層，下屬見到都要退後兩步嗰隻，不過年前佢大女到了上中學年紀，性格成型的重要時期，好難只依賴工人，皆因工人只管接送餵食，不管少主人是否養成港童性格，偏偏佢份工工時長到嚇死人，根本無辦法擠出時間來相處，權衡好久，忍痛放棄高薪厚職。

如果她繼續拼搏，以佢才幹，現時一定已係一人之下萬人之上；然而佢o依家日日早上七點起牀預備飯盒，接送佢哋返放學，之後上各種興趣班，晚上做埋補習老師，至於自己，往往求其着件衫，妝都唔化就出門口。佢苦笑話呢種生活仲要過多幾年，到大女去外國升學至會有改變。

問佢值唔值得？佢反問：「有無其他選擇？」她觀察到女兒有行為問題，而女兒有時一句「你都成日不在家，點知我做乜？」簡直直攻入她的心坎。未有小孩前，她是百分百投入的專業女性，但幾年前辭工前夕，家庭、事業兩邊都只能貢獻八成精力，而兩邊都在繼續苛索時，她都快要瘋了。

另一個讀完大學的朋友，剛剛生仔，老公驚佢辛苦，喊着叫佢在家湊BB。別以為這工作輕省，事實是佢二十四小時圍住BB團團轉，既忙且累，一停下來只想倒頭大睡，咁耐以來只做得一次facial，成盒面膜要轉贈母親。

她形容現時生活寫照，是「起得比雞早，吃得比豬差，睡得比狗晚，跑得比馬快。」

筆者阿媽是車衣的，家裏就是小型工場，命運不需要她選擇，她邊湊我邊車衫，晚上還要洗衫抹地，二十四小時無停，好本事。那年代的母親，不需也沒有能力看孩子功課，教育責任全交給學校。

這時代的高學歷女子，在家庭和事業之間往往是身心俱疲；社會給了女子受高等教育的機會，卻沒足夠多元的空間，讓她們來回遊走職場，彷彿是離了場，便休想再回來，而家庭又是她們甩不了的責任，孩子的教育，又轉移到了家長身上，這年代陪孩子重新讀一次中小學課程的母親多的是。

現代女仔讀書叻，可以選擇不同的工作，各大院校裏，女生都是佔大多數的，這些女性只貢獻一半人生為事業奮鬥，確是可惜。大企業能否有一些彈性政策，吸納這班有能力但被時間高度限制的精英？