白頭到老呀！

二○一四年十二月二日好兄弟蘇永康大婚，作為姊妹的我非常緊張，最緊張是起唔到身！整頭化妝的call time是0800，對我這種有「晨早起牀恐懼症」的人來說，0800是一個十分可怕的考驗，於是小女決定在前一晚，預先在洲際酒店book了一間房間，蘇氏大婚之前一晚在酒店睡最安全，然後留了一張門匙卡給化妝師，為免唔知醒起身，過了吉時玩兄弟的機會！

小女大大話話做過幾十次姊妹，算是相當有經驗，可能因為我夠嘈，好友們結婚通常都會搵我做姊妹，嗌開門利是都可以嗌得多啲！但今趟竟然被公公豬（蘇永康花名）考起：「我哋呢班姊妹唔貪心嘅，我哋要你一季買衫嘅錢就夠喇！」「我得封利是咋！」「咁薄嘅？有冇搞錯呀？你有冇心娶阿TA（Anita）o架？」「你開嚟睇吓先啦！」「吓！支票嚟嘅？邊有人開門利是畀支票o架？仲要無銀碼嘅！你玩嘢呀？」「無銀碼嘅支票係代表阿TA係無價寶！你哋鍾意填幾多就填幾多啦！」「嘩！好豪呀！好啦，我哋一人要一個Birkin啦！」阿Jade（雷頌德太太）插嘴：「仲要係鱷魚皮嘅！」「是但你哋啦！」「公公豬萬歲！」（當然我哋唔會咁狼，食咗人隻車啦！）

公公豬要白頭到老呀！既是姊妹又是好兄弟的我，當然出盡力支持啦！

輪到阿公朗讀「愛的宣言」，寫這篇宣言的重任交在我身上，是我們一班姊妹事前開會決定的：「愛的宣言梗係倫仔寫啦！」「但係……阿Y喺度喎……不如叫YY寫啦，佢寫得好好多喎！」「你怕醜呀？」「係費事獻醜啫！」「唔怕啦！倫仔你寫啦！阿Y係兄弟吖嘛！」新娘子開到口，無得objection啦！於是我花了兩日一夜時間去構思，終於決定用阿公的情歌，砌成一篇「愛的宣言」，原來挺好玩的，我google search了：「蘇永康song lists」，嘩，原來公公豬唱過咁多情歌，串得埋喎！結果我寫了一篇很長的「愛的宣言」（因為他實在有太多歌了！）而其他姊妹就幫我找到「聖旨」一封，最後要阿公跪在地上讀出來：「我蘇永康一直都不想獨自快樂，可幸情來自有方，就在阿臣的婚禮上，邱比特忽然眷顧我，讓我在燈火欄柵處，找到我的生命色彩、我的紅顏知己。我一想你便醉，原來愛是這樣微妙，你是我最深刻的愛！……我發誓以後，就算我們走到海角天涯，就算我們七老八十，我們也會像每日一初戀，sweet到八十歲！……」很高興阿TA非常滿意這篇「功課」！

到了晚上的豪門夜宴，我們幾個姊妹負責坐在reception招待嘉賓（及收人情），嘩！厲害囉！報紙上形容為：「星光熠熠，勁過頒獎典禮」，很多巨星如張學友、徐小鳳及陶……等等都有到賀之餘，小女覺得最強勁的賓客是：樂易玲、何禮全、王維基三個電視台的代表一齊到！嘩！呢個場面應該任何頒獎禮都見唔到啦！！最搞笑是，當張智霖走到我們reception面前，各姊妹紛紛尖叫起來：「嘩！好靚仔呀！」「Hello！請問我坐幾號枱呀？」我搶着說：「唉……你呀……你直上1625號房吖（我間房！）我一陣會親自招呼你o架啦！」嘩！尷尬到面紅耳熱的Chilam更迷人！

這個浪漫婚禮就在一班超級群星的歌聲下（及飲醉酒賓客的嘈吵聲下）熱熱鬧鬧地完成！我的強項接花球呢？今次非常禮讓地讓了給我個妹祖兒，造馬都要造畀佢，因為佢potential大啲！（嘻嘻！）