日本留學記之為男友撼頭埋牆

約得我去滑雪的，不用多說已經知道他是個滑雪高手啦！我倆都是玩snowboard的，（型啲嘛！）我只懂在雪地上滑來滑去，而他就走上跳台上打觔斗，在小女面前一顯身手！嘩！一個咁型嘅人做出一件咁型嘅事，怎會不「冧」呢？我徹底地被融化了！！然後他再帶我去了台場玩摩天輪，搞到我以後對台場、及世間上所有摩天輪都產生了恐懼症……因為……他就在那摩天輪上開口了：「可以做我女朋友嗎？」嘩！使唔使咁快？又使唔使咁浪漫呀？成件事絕對是有組織及有目的的行動！「你會唔會問得快咗啲呢？我今日先第一日同你單獨出街咋喎！」（雖然我相當肯定我會say yes，但始終我真係未真正認識佢，同埋都要扮吓叉燒吊高嚟賣，皆因敵方已經上釣了！）「我已經暗戀你半年啦，你睇唔出o架咩？」「嘩！你唔早講？你唔講我點知呀？」（真係靠眼神估咩？）「其實我一直唔敢同你講，甚至盡量避開你唔同你玩，因為我之前真係有女朋友，佢對我好好，我唔想做出一啲對唔住佢嘅嘢！直至到我覺得自己對得你愈耐、就愈鍾意你，我已經覺得自己對佢唔住，於是我決心同佢講分手。我唔想一腳踏兩條船，我想清清楚楚，先正式約你，咁樣我個心會好過啲！」「我都估到你有女朋友o架啦！」嘩！

這樣純品的男人哪裏找？？！！ 我真的這樣有福氣嗎？就算這全是一個謊話，對於一個只得二十歲的男人來說，也是一個非常有才華的編劇，小女最欣賞有才華的男人了！哈哈！

我對摩天輪有恐懼症，因為日本男友就是在摩天輪上示愛。

終於開始與日本人拍拖了，有甚麼趣事呢？首先，是我的日語突飛猛進， 皆因每晚小女跟我的日籍男朋友都會煲幾個鐘頭電話粥，原來沒有面對面的肢體語言而「齋talking」，是練習外語的最好方法。每當聽到自己不懂的，對方就要解釋給我聽，最後，學得最佳的，當然是一口流利到飛天的罵人日文！（我相信自己用日文鬧人比用廣東話流利！）

不是說日籍男友好到加零一嗎？何解要罵到他上天花板呢？哼！這可算是文化背景不同的問題了！記得有一次，我倆放工後一起走進便利店買東西吃， 男友仔佐籐正行在我的前面，怎料，他一推門進去後，就沒有把玻璃門拉住， 竟然狠狠地讓我一頭撞到玻璃：「唉吔！好痛呀！ 你有冇搞錯呀？唔幫我拉住道門嘅！你想撞死我呀？」「呀！對唔住呀！我唔知呀！我不嬲都無呢個習慣o架！」「無呢個習慣？咁你以前啲女朋友就咁撞死晒啦！」「唔係呀，佢哋慣咗會自己拉住道門o架！」「我唔係日本人，我唔慣喎！你以後醒醒定定啦！ 」原來，人人都話日本人大男人，查實他們性格上絕不算是大男人，而且很細心並處處遷就，只是生活上的小習慣會有「讓女友撼頭埋牆」的情況出現， 實在是可以原諒的。（只要大罵完他一餐，出完氣後！）

這段童話般的感情只維持了大半年……何解？ 請看下回分解！