接受「冰桶挑戰」 蓋茨精心設計淋自己冰水
外國近期流行一個叫「冰桶挑戰」嘅籌款活動,目的在於提高大眾對肌肉萎縮症(ALS)嘅認識同援助,而參加者會淋自己冰水,再點名挑戰其他人,而被挑戰嘅人就需要喺二十四小時內淋自己冰水,如果唔係就要捐一百元美金。呢個活動有好多名人都參與其中,就連美國歌手Justin Timerlake都有份,不過估唔到連微軟創辦人蓋茨都有參與! 事緣於星期三(八月十三日)Facebook創辦人Mark Zuckerberg就上載自己淋冰水片,片中仲點名挑戰蓋茨,點知蓋茨又真係接受挑戰,喺片入面見佢好認真咁設計一個裝置,原來就係為咗淋自己冰水,不過喺淋之前佢都一口氣挑戰咗其他三位名人包括美國真人騷《一夜成名》主持Ryan Seacrest,講完就拉裝置,冰水即時兜頭淋,凍到蓋茨向後縮一縮。難得蓋茨可以為慈善放低形象,仲咁認真玩自己,網民都大讚!