蔡子強的飯局逸事
《東周刊》專欄作者之一蔡子強(蔡子)呢期人氣爆燈,出新書梗係要捧場。佢喺朋友間出名嘴刁又喜歡講下食物背後的故事。大作是關於古今中外不同國家領導人飲食習慣,還有宴客餐單反映嘅微妙關係。
蔡子寫這書做了大量資料搜集,遠至慈禧太后愛吃哪些點心,到毛澤東的無辣不歡,還有香港前途談判期間的餐桌交鋒,食咩代表會談氣氛好定壞,都有生動的描述。對於香港政圈飯堂,佢因為不時以學者或評論員身份到處飯局,都觀察到唔少逸事,例如不同官員的個人飲食風格。
佢話,政務司司長林鄭月娥就係官場出名食得清淡的高官,同佢飯局,最好預先打定底,或者之後再吃多一餐。官場流傳過一個笑話,話某位行政會議成員被林太邀請到其辦公室工作午餐,有人捧上一份三文治,議員以為是頭盤,三扒兩撥食完,怎知一直到傾完都再無食物上桌,肚空空離開,原來林太真的吃得咁簡單。林太後來試過官邸宴請立法會議員舉行政改晚飯,五菜一湯,一貫份量少選擇更少,有議員直認要去消夜醫肚。
至於財爺曾俊華,蔡子就透露咗財爺最鍾意整的一味焗火雞,經改良之後,雞殼內加入中式臘味糯米飯,焗完滿室飯香,是愛煮食之人值得參考的食譜。
蔡子覺得,一餐飯可以反映領袖氣度,和主人家想講的政治訊息。例如佢去過不少駐港總領事的家宴,話多數家廚煮的,都不及在五星級酒店咁好食,但卻是一種身份象徵和禮遇。
筆者打蛇隨棍上,叫佢爆下本書以外嘅秘聞,例如同幾任特首飯局嘅格局,佢就話第一任特首董建華最誠懇,邀請佢上禮賓府食午飯,不停問佢各方面嘅睇法,問到飯都唔記得食,仲即席拿起菜單,在空白地方細心寫下蔡子嘅意見,仲話會跟進,搞到蔡子感動了好一排。不過一段時間後,佢至知道,用筆記下要點係董生嘅習慣,基本上佢對好多人都係咁。
至於第二任特首曾蔭權,蔡子形容他較多請他吃下午茶,通常都有鬆餅加曾太自製的果醬伴食,比較西式,亦相當有特色。至於今屆特首梁振英,佢就話仍未有機會同佢一聚。
其實年前梁振英剛當選後,立即出席一個由建制派搞的大和解飯局,當時只關心咩人去咩人唔去,但蔡子就話菜單充滿政治玄機,例如杜仲牛尾湯,有補血、固本培元之效,對於因為特首選舉而大撕裂的建制派,有「修補」的作用;另一道菜當紅炸子雞,就有形容梁振英當紅之意;至於飯後沒有甜品只得水果,蔡子就話有「走糖」(走唐英年)的聯想。姑勿論係咪諗多咗,但咁樣演繹菜單,都幾有趣。