驚喜琪招
近年我同阿Fi（薛凱琪）並肩作戰，帶畀你哋一種新鮮感，而且我哋理念一致，拒絕停步，所以嚟緊9月，阿Fi就再次踏上紅館舞台，舉行演唱會，心思同新意思，缺一不可！
今晚「Paco巨星飯堂」，我就率先慰勞一下一直忘我工作嘅阿Fi，帶佢去到位於長沙灣嘅「鵜舞Umai」，一間令人有驚喜嘅居酒屋，配合阿Fi即將為粉絲炮製嘅surprise！
今晚我同阿Fi喺位於長沙灣嘅「鵜舞」，歎住爐端燒暢談音樂大計。
全力以赴
阿Fi入行10年，對事業仍然有一團火，佢係唯一一個令我要提醒佢休息嘅artist，係典型嘅工作狂。「我同你都係獅子座，所以樣樣嘢都要做到最好囉。哈哈！有好多時啲idea都喺深宵時份先最洶湧澎湃，而且我又瞓唔着，咁不如繼續做嘢啦！」
哈哈哈！阿Fi咁講，係因為有好幾次我喺深宵仲見到佢update微博，講緊係凌晨4點幾5點，我都關心佢休息得唔夠o架！
由拍MV（上圖）到開show（下圖），我同阿Fi都咁隆重其事。
「其實OK嘅，我有嘢做就唔會覺得攰。好似喺決定開演唱會之前，我自己都會搵排舞老師練舞，佢都問我，又唔係出碟，又唔係開show，點解仲會搵佢練？我一直都覺得，每個moment都要令自己處於ready mode，一有機會嘅時候，就可以將自己最好一面畀到fans睇。
「所以o依家一敲定9月開show，我就已經隨時投入得到，仲要好多謝Paco你幫我推咗好多片約，畀我專心去練歌、排舞，做得更加好！」
壺燒榮螺，保持原汁原味。
呢個帆立貝燒，一流！
燒和牛香脆可口。
刺身由日本直送，包括牡丹蝦、赤身、油甘魚、中吞拿魚、三文魚、帶子同鯖魚，夠晒新鮮！
改變風格
哈哈哈！阿Fi一直用心工作，我梗係想佢更加專心，做好個show，所以連拍MV都要一絲不苟。「新歌〈弗洛蒙〉，我搵咗Khalil（方大同）幫我寫，雖然係一首快歌，不過我就想改吓風格，所以拍MV嘅時候，一個dancer都唔用，反而用我自己虛構出嚟嘅場景配合。
「雖然冇咗舞步，但係多咗好多肢體語言去表達個古仔，由好sweet到嗌交，都係演技大考驗！」
雖然今次拍MV唔用舞蹈配合，但阿Fi已經計劃好，將火熱舞蹈留待9月喺紅館爆發。「因為兩年前喺紅館開show，快歌環節好受歡迎，所以今次會加重呢part嘅表演。今次係第一次以『太陽娛樂』藝人身份開show，就更加要落120%力量去做！」
阿Fi表情多多，令氣氛更加relax。
餐廳嘅爐端燒採用備長炭炮製，更加健康。
備長炭原始燒大蝦，蝦足足有28cm長，肉質可口。
北海道喜之次魚，香滑！
操Fit自己
o依家我見親阿Fi都會叫佢食多啲嘢，因為佢實在太瘦喇！不過佢話：「喺壓力之下，我好難會增磅。不過呢種壓力對我嚟講係好事嚟嘅，而且要開show，我覺得keep住o依家嘅身形，喺舞台上會好睇好多。」
面對日式爐端燒，阿Fi今晚「大開殺戒」，「我好鍾意食日本嘢，因為份量少之外，sashimi唔肥，今晚食爐端燒又唔油膩，啱晒我！」
除咗飲食，阿Fi最大嘅運動量就係排舞，「一個禮拜都有幾次，有時我會喺屋企跑步（跑步機），要keep住運動。」
好！我預祝阿Fi good show！乾！
餐廳創辦人Eric（左）係我另一位酒腳，佢係資深飲食人，我對佢梗係有信心！
為咗事業拼搏嘅阿Fi，專業得令人敬佩！
黑豚肉煮，夠晒入味。
宮崎金獎煙黑豚肉，肉與脂肪分布得啱啱好，juicy而不肥膩。
一個拼盤，蘊含日本各地精華，其中免治雞肉串仲有梅肉紫蘇葉、柚子胡椒同蘿蔔蓉酸汁（左至右）3款口味。
鵜舞Umai
