臣的啟示

突然記起，在N年前的某一個晚上，（「N年前」是指，小女仍然是不務正業、每天每晚只顧着玩，過着「社會寄生蟲」的日子之時期），我們一班老死，相約在我契哥霆鋒的band房內看電影，試試他新買回來的無敵100吋projector，當時剛好我買了一對rollerblades送給MaMa（何超），於是我便即場試穿給MaMa看，並順道教她踩踩。

正當小女在那100吋projector旁邊滑來滑去，獨個兒玩得興奮之時，Uncle Eason（陳奕迅博士）竟突然走過來捉緊我的手臂，把我整個人制停下來，最初我還以為他覺得我阻住大家睇戲，但原來他是專誠走過來捉埋我一邊訓話的！（陳博士查實是個訓導主任！）

他苦口婆心地說：「倫仔！你咁落去唔得o架！你到o依家都淨係掛住玩！我哋呢班人裏面，讀得書最多嗰個係你，但最唔肯做嘢嗰個又係你，你唔覺得好晒o架咩？」（當時的我仍很反叛，只醉心玩、享樂至上，從來未想過自己是需要工作的！）

陳奕迅當年對小女的一番「訓導」，至今仍記憶猶新。

「Uncle，得o架啦我，我知道你係好擔心我，但係我真係OKo架，我淨係想玩咋，我唔使學到你咁有成就o架！我o依家已經好滿足我嘅生活o架啦！」「倫仔，做人唔可以玩足一世o架！乜你無諗過大個女要畀家用返屋企，要養番你父母o架咩？」「真係無諗過喎！我知我老竇會養我一世o架啦！你放心啦！我唔使要有咩事業o架！我好知足常樂o架！I have nothing to loose！我一直喺地平線上，無起無伏，自由自在，幾好呀！我唔使好似你捱得咁辛苦添！」（仲駁嘴！）「唉，咁算啦，我都係話你唔聽o架啦！不過我真係覺得你明明咁有才華，但係就晒咗啫！」「Uncle，我真係OKo架！I have nothing to loose！我做人完全無壓力，幾好吖！」

事隔N年之後，小女已經埋頭苦幹，做了第四輯《風行》系列，一次到北京拍攝，剛巧撞正阿臣在北京開演唱會，於是大家決定停拍一晚去看他的演出，好讓我探探老朋友班！當小女一入了後台，他正在吹頭，我便第一時間從後面抱着他，給他一個驚喜：「Uncle！我嚟咗撐你場呀！撐到你嚟北京呀！我今晚停工都嚟做你嘅職業fans呀！都算係咁啦啩？！」

「嘩！倫仔！好感動呀！攬吓先！」「，Uncle，如果我今個trip拍唔晒啲嘢就賴你o架啦！」「你得o架啦！我o依家一啲都唔擔心你啦！因為you have nothing to loose！你個節目只係做番自己咋嘛，你個人本身已經咁有character，豁晒出去嘅，你一定掂o架啦！其實我真係好開心見到你變到o依家咁！終於都大個女！識諗啦！」「哼！我o依家買嘢shopping都係用自己錢o架！唔使老竇幫我找card數o架啦！我之前仲送咗隻『撈』（Rolex）畀佢添呀！幾勁呀！」「叻女！叻女！呀！唔係，o依家要叫你做才女先啱啦！哈哈！」「其實你N年前捉住我同我講嗰番訓話，我到o依家都仲記得o架！因為你當日阻住我玩吖嘛！哼！」

老實說，自己難得有個這麼對我好、這麼關心又擔心我的好朋友，實在是一件非常幸福又幸運的事！感謝「臣的啟示」，Uncle Eason，我不會再令你失望的！因為I have nothing to loose！所以我可以盡情地豁出去工作！哈哈！