高鐵風波燒大 政府力救張炳良

高鐵工程風波愈燒愈大，今次出事竟然係民望一直唔錯的運房局局長張炳良。本星期一下午，張炳良到立法會為「合謀隱瞞」拆彈，算是坦白。

有政圈人士話，張炳良呢幾個月相當黑仔，有AO直情話佢「海陸空」三面都出事，幾單「考牌」之作都肥佬，先有收拾南丫島海難的爛攤子，報告雖已出籠，但家屬唔收貨，跟住唔到一星期又爆出高鐵延誤事故，他再成眾矢之的，相信下一仗機場第三條跑道工程，張炳良都要打一場難打的仗。

多名建制議員上星期六至今不斷收到政府高層游說的電話，幫張炳良拆彈，「佢哋不斷耍冧，話問題出喺港鐵對通車日期預計得太樂觀，又話運房局一直都有質疑，張炳良亦無向公眾交代得清楚等等。」顯示港鐵要負好大部分責任。

張炳良身兼運輸及房屋兩大範疇政策，公營房屋問題已要步步為營，高鐵工程更令他成眾矢之的。

消息人士透露，港鐵喺機建上唔係新仔，有豐富經驗，當年高鐵工程上馬時，根據顧問建議，認為政府只需要把持大方向監管就得，「如果要仔細審視，就唔止係路政署管咁簡單。」

事實上，咁大工程有延誤不是不尋常。問題是張炳良喺港鐵喺四月十五日「賴地硬」令工程延誤至一七年後話自己「好驚訝」，之後根據文件，原來他一早知道一五年未能完工，令外界覺得他一係合謀港鐵隱瞞，一係懵盛盛畀港鐵呃埋。

消息人士反問，指控涉及誠信問題，反問張炳良合謀對佢有乜好處？「去年十一月政府已有質疑，不過韋達誠親自打電話來，話依然可以維持一五年完成。以港鐵過往做大型工程的紀錄，當時政府選擇讓港鐵繼續。大家嘅理解，係一五年完成主要工程，再經六至九個月測試，即係一六年通車。點知港鐵喺今年四月突然話要延至一七年，張炳良驚訝，係因為畀佢認知嘅通車時間遲了足足一年。」

泛民打自己友向來不留情，今次由張炳良點出高鐵火頭，激進派又多一個衝擊目標。

本周一，立法會上討論高鐵延誤時，各派議員磨刀霍霍，矛頭指向韋達誠，要求他引咎請辭，反而對張炳良就較為「疑中留情」。政圈人士就話，「炳」張炳良最厲害嘅，係佢啲泛民舊戰友，其中民主黨胡志偉追殺最落力，一早表明會提不信任動議，又用到「不可饒恕」、「謊報軍情」呢類好重字眼，好似非要佢人頭落地不可。

有民主黨人士透露，胡志偉狂砌張炳良，多多少少反映昔日主流派同匯點派系恩怨，到今日仲未算清。黨內好多人都知，當年民主黨同匯點合併，但司徒華一直唔like匯點同張炳良，逼到張炳良要退黨亦係華叔。作為華叔徒弟的胡志偉，多年來一直喺九龍東搵食，但長期屈喺另一匯點元老李華明之下上唔到位。今次張炳良「蝦碌」，不留情面唔奇。