志偉仔煙不離手
曾志偉囝囝曾國祥（Derek）遺傳咗老竇嘅優質DNA，除咗電影幕後編劇、導演兩瓣做齊，呢期連演員都撈得幾好，長拍長有，戲份仲愈佔愈多添。好似喺《3D豪情》裏面，跟住杜汶澤過日本觀摩AV製作，有一場全男班光脫脫出浴鏡頭，就最叫東姑印象深刻。
不過，私底下嘅Derek就要檢點下啦！早幾日《3D豪情》慶功宴，東姑見佢一離開會場，都行唔夠幾步路就煙癮難忍，即刻邊行邊扯煙。食煙始終係不良嗜好，就連志偉，東姑都好少見佢食煙，不如得閒跟老竇去踢吓波，咪有益身心囉！
一離開慶功會場，Derek即急不及待攞煙出嚟，邊行邊趕住係咁扯，煙癮好大吓。
