喬寶寶老婆人肉速遞
東姑猶記得舊年嘅呢個時間，喬寶寶喺尖沙咀嘅一個卡拉OK搞咗個生日兼歡送會，話咁快又一年嘞。而經已唔使為咗喬嫂嫂嘅居留問題，陪坐移民監嘅寶寶，o依家只會間中飛返去蘇格蘭度假，認真疏乎。
四月廿三號係寶寶嘅生日，東姑日前就發現喬嫂嫂人肉速遞，返咗嚟香港為老公預先慶祝。原因係細仔喬寶貝廿二號就要開學，所以二十號喬嫂嫂又要飛走。
呢日雖然係為喬寶寶預祝生日，但係就似係喬寶貝嘅生日多啲，因為點菜、飲嘢全部由寶貝仔話晒事，就連老竇想吹蠟燭前，都畀乖仔捷足先登。
平時工作幾忙，喬寶寶都會抽時間飛去蘇格蘭探個細仔，所以佢哋兩父子關係非常好。
當日，東姑喺佐敦撞到寶寶同老婆，拖住十一歲嘅細仔喬寶貝，呢日喬嫂嫂仲專登着到靚靚咁，同老公預祝四十四歲嘅生日。而為咗遷就老婆嘅口味，寶寶揀咗間喺廟街附近嘅印度餐廳Mala's，細仔知道老竇生日特別興奮，不時手舞足蹈又唱印度歌。身為廿四孝老公兼老竇嘅寶寶，就不時夾餸畀老婆同仔仔，最後為咗畀老公驚喜，嫂嫂預先安排咗生日蛋糕做甜品，一家三口，溫馨到羨慕死人。
食完印度菜之後，寶寶隨即又急急腳鬆人，原來佢約咗契姐李麗霞（黑妹）喺附近再開餐。寶寶話七月頭有脊椎問題嘅細仔會做手術，所以七月份佢就會飛去蘇格蘭陪伴左右，順道參加埋大仔嘅畢業禮，各位讀者又冇得見寶寶一排啦。
