新生代唔怕畀蝨咬

跟科技大學校長陳繁昌傾起，佢近年接觸好多年輕人，話新生代大部分生於安樂，家庭負擔不大，大學畢業後不急於賺錢，有的工作一兩年就去世界各地做義工。呢種風氣喺歐美幾盛行，有些大學生面試，甚至已不再諗住入邊一門專科，反而會問番教授，究竟讀甚麼才能夠解決世界貧窮問題，陳繁昌覺得呢啲學生志向十分宏大。

其實，香港有好多年輕人都有這種心志。好似恒基公關大姐大Bonnie，她愛女（見圖）在美國唸工程，年年暑假都去落後地區幫人起橋修路，Bonnie姐透露，囡囡今年做埋team leader，六月份會去烏干達幫一間女子學校起宿舍。

講起女兒，Bonnie就停不了口，話個女由圖則設計、向人籌款都係跟同學仔一腳踢。六月份抵達當地後買材料，逐塊磚由零開始起出一間屋來。烏干達女子很少機會受教育，之前有國際機構起咗女子學校，但學生只能在班房過夜，所以有需要有住宿的地方。

媽咪喺大企業做，無理由咁近城隍廟唔求支好籤，Bonnie笑說女兒有問過她籌款有何秘訣，佢就指教兩招，最緊要有簡而精的計劃書，講清楚幫助對象面對的困難和背景，最重要詳列過往有何成果，捐款人自然可以快些一錘定音。

事實上佢個女由中學開始，每年暑假多數會去內地做義工，足迹遍及貴州、西安、北京、桂林、中山，身經百戰。Bonnie雖然話放心，知道個女應付得來，但眼見女兒每趟風塵僕僕回來，身上過百粒被蝨子咬的痕迹，一個星期才能沖一次涼的苦況，總會心痛，「問佢唔去咁遠咁落後地方得唔得？佢就話要往最需要幫忙嘅地區裏去。」Bonnie只能由她去。

另一個就係幫浸大新聞系搞國際新聞碩士課程嘅首席講師馮強，他的高材生女兒幾年前唸完法律，在實習期間萌生去第三世界做義工的念頭，馮大哥得一粒女，自然緊張萬分。佢講笑話擔心個女會畀食人族食咗，又驚佢遇上意外，再者佢當時喺數一數二嘅大行孖士打實習，機會難得，應該完成實習再另行計劃。左勸右勸，女兒終暫且擱置念頭。馮大哥話如果女兒堅持要去，佢寧願放假一年，陪女兒去闖蕩喎。

未知是否咁啱得咁蹺，以上兩個不怕艱辛的例子都係女仔，大志不可小覷也。