![](http://eastweek.my-magazine.me/tmp_images/article_images/32131/nm_72a625.jpg)
王維基想租亞視頻道 阿爺未必肯
政圈淡靜,傳媒界反而一波未平一波又起。繼電台名嘴被炒,上周有報界高層遇襲,引起全城震怒;新聞多多嘅亞視亦不甘寂寞,事關港視主席王維基想租用亞視頻道,搞到做咗半年不到嘅亞視執行董事雷競斌同亞視主要投資者王征炒大鑊,被迫起身。不過,據聞中央未必喜歡王維基取得免費大氣電波,是否成事,仍存變數。
人稱「吔叔」嘅雷競斌,去年九月才被亞視委任為執行董事,卻一直同老闆王征意見相左,突然被撤職,怒氣難消下走去通訊局投訴;不過後來雙方講掂數,會補足賠償畀佢自動辭職。管理層同大老闆埋身肉搏,咁嘅場面真係聞所未聞。
![](http://eastweek.my-magazine.me/tmp_images/article_multimedia/32131/1_n.jpg)
有傳雷競斌(右)同亞視主要投資者王征,就向王維基(下)租出頻道一事意見不合,結果做咗執行董事唔夠半年就被迫起身,由葉家寶(左)接任。
線人話,吔叔向來心直口快,上場後一直同王征對着幹,早前竟然要炒王征心腹、財務總監李錫勛,驚動另一名大股東黃炳均急急現身做和事老。上周有人喺亞視見到黃炳均帶住李錫勛同吔叔道歉,吔叔先將佢復職,不過話口未完,就輪到吔叔自己起身。
其實早前已有傳王維基同王征「密斟」,有意入股亞視,但只肯出幾億,認為亞視值十億嘅王征覺得佢誠意不足,結果談判拉倒。點知一個轉身,王維基又透過中間人再拉攏王征,想租用亞視一至兩條數碼頻道。王征好快有反應,覺得係條財路,想以一千萬一年租一條頻道畀佢,當係幫補下支出都好。
點知吔叔對此反應好大,認為以佢對阿爺嘅了解,一定會反對,喺管理層會議上不斷同王征頂撞,搞到王征怒不可遏。佢個位o依家由葉家寶頂上,葉生日前已經證實,話吔叔「在亞視已經冇任何職位。」
不過如果咁就以為王維基租到頻道機會大增就錯了,據聞阿爺對王維基有可能取得影響力更大的免費電視播出渠道十分在意,擔心王維基意不在搞電視,亞視最後會否租出,仍有變數。
有線人話,王征仍然好老定,據聞佢手上仲有幾個潛在買家,唔同王維基合作,佢都依然有計。
![](http://eastweek.my-magazine.me/tmp_images/article_multimedia/32131/2_n.jpg)