何超蓮 藍甲除焦慮

貴為賭王千金，何超蓮同台灣歌手吳克羣拍拖兩年幾以嚟，愛得真黐纏，超蓮唔單只甘心做跟得女友，男友飛到邊就陪到邊，開工買埋嘢食外賣探班，有時仲送上門飛埋過台灣相伴，真係超級服侍周到o架！

早幾日，東姑見超蓮出巡去中環買禮物賀媽咪六十大壽，着得好hip hop嘅佢，一支箭咁衝上七人車，全程嬲爆爆唔願對住鏡頭。唔知呢排係咪見少咗愛郎，搞到人都有啲躁底？

話時話，東姑留意到佢搽嘅藍色指甲油好鬼搶眼，有玄學家話過搽咩色指甲油同水晶一樣，可以改吓運咁。東姑翻查過，藍色據聞可以鎮定心神，仲可以解除對愛情嘅焦慮。同男友仔長期異地分隔，兩地相思嘅超蓮，又愛得咁鬼黐纏，唔知係咪全靠藍甲油好好冷靜吓呢？

着到成身hip hop嘅超蓮，搽咗藍色指甲油（箭嘴）好搶眼，成日見唔到愛郎囉囉攣嘅佢，唔知係咪靠搽呢隻色甲油等自己變得冷靜啲呢？

超蓮出巡去中環同朋友high tea，來去匆匆，而且全程黑口黑面，心情好似有啲躁躁哋。