一個是電台節目《口水多過浪花》中，經常被Do姐鄭裕玲和少爺占取笑嘲弄的對象；一個是廣播劇《真情》中，人見人怕、新抱剋星的奶奶。「當奴」與「阿家」雖然予人印象兩極，但其實都是Donald唐劍康，兩者的特質同樣來自他本人。

「有啲message用『當奴』嘅身份講出嚟，好似未必啱用，但如果用『阿家』嘅身份，就可能會啱啲，其實都係一個平台嚟啫，不過無論如何，佢哋骨子裏都係一樣，都係一個把口好賤但心地好嘅人，如果我唔係『當奴』同『阿家』，又點會講到佢哋嗰啲賤嘢呀？哈哈！」

是的，假如有天「當奴」以「阿家」的尖酸刻薄來跟Do姐和少爺占主持《口水》，最後可能只會變成一個吵吵鬧鬧的節目；而若然「阿家」以「當奴」的下把姿態對待新抱阿琴、麻雀腳The太和誇太，故事就會變得很肉麻。

畢竟，每個人本來就是可以多面睇的，而Donald都只是把自己不同的特質，放諸於不同的身份和平台演繹出來罷。「講到底，我哋都係用緊唔同嘅方法，去搵自己嘅身份咋嘛！」

查實，Donald並不是表面般只得無聊和搞笑。

上等人

對Donald來說，「阿家」這個角色的誕生，其實是要多謝梁舜燕的。「都幾無聊o架，有日我睇電視睇到梁舜燕賣『唐太忠活骼油』廣告，我就諗：對上一次見到佢，已經係細個睇《真情》佢做『上等人』嘅時候。

「佢個角色好好笑，成日狗眼看人低，但你話佢係衰人咩？其實佢只係吱吱喳喳，個人有少少麻煩，但朋友有事佢又會匿埋喺屋企喊嗰啲。就等於香港人咋嘛，有乜嘢事要捐錢，個個都冇say noo架，但要評論一啲唔忿氣嘅事，嘩，把口可以賤到……出唔到街呀真係！就係咁，我諗吓諗吓，就寫咗呢個廣播劇出嚟。」

小時候的Donald（左），已習慣自己照顧自己，他亦甚慶幸沒有因此學壞。

廣播劇版的《真情》，故事主要圍繞說話涼薄的阿家和新抱阿琴的婆媳關係。「我有啲朋友都有遇到啲好怪嘅奶奶，可能食食吓飯，會突然同個新抱講：『我一蚊都唔會分畀你！』然後就繼續扒飯……嘩！乜嘢事呀？又好似我上Baby Kingdom（親子王國網站），有個forum直情叫『婆媳關係』，嗰度都畀到我好多靈感，幾乎每一單事件都係癲嘅！呢個『阿家』，就係咁可以不斷有嘢畀我寫落去，好似豐富咗我嘅生命咁！」

所以，他四月舉行的首個個人show《當奴All You Gag歡樂阿家藐咀騷》，就是以「阿家」的身份站台。「我幻想大家都想見到佢囉，哈哈！咁我入咗行咁多年，儲儲埋埋都應該有五、六個fans啩！哈哈哈！」

四月的首次個人騷，將以「阿家」奄尖腥悶的身份站台，預售反應熱烈，未公開售票已加場。

下把人

他入行廿年，商台是他的第一份工，也是至今的唯一一份工，職位由當初月薪三千七的總務部office boy、文員開始，成為了今天叱咤903助理總監，一直默默耕耘。

「呢廿年喺商台，我仲做過總務部、做過operator、做過製作部，中間又去過做電視主持又盛，所以我唔覺得悶。」

十年前，他因為與少爺占組成I Love You Boyz（艾粒），建立起無聊搞笑的形象，又因為其的骰外形，經常在不同的節目中，成為被其他主持或嘉賓欺負嘲弄的對象。

「自己知自己事，我呢啲下把性格，就係要humble囉，要認命囉！呢個世界每個角色都要搵人做o架啦，最緊要係自己要搵位走，同埋enjoy嗰樣嘢囉！咁我o依家揀咗呢個位，我就唔會後悔！冇得改、冇得轉o架啦！好似做《口水多過浪花》，對住Do姐、阿占，你點剷啫？剷乜啫？敢剷咩？個角色係咁就係咁，轉乜鬼嘢呀？咁樣幾好玩呀！哈哈！

「真係o架，有啲人天生係男主角，有啲人天生係第二、第三，我屬於後者囉，但我又好enjoy自己呢個位囉！即係如果話開套戲畀我擔正，我死畀你睇呀！我點擔正啫？唔通畀我去做『賤輝』張家輝咩？喂，我又潺又細粒，點做啫大佬？最多咪做到個比賽裁判！咁我enjoy咪得囉！」

與少爺占合作多年，建立了無聊騎呢形象。

好小心

Donald是獨生子，自他三歲時母親不辭而別後，便一直在單親的環境下成長。「我老竇又要返工，又要喺大陸做生意，我由小學至中學，到出嚟做嘢，都係自己照顧自己，所以我唔可以令屋企人擔心，咁我咪要做好自己囉，可能係咁，久而久之我做每件事都超小心，每一步都要諗好耐！」

例如在工作上。「我唔係一個好高騖遠嘅人，所以一直都唔會去爭取一啲根本唔啱自己嘅嘢，或者位置，所以我好相信自己唔會做到阿哥，反而o依家我睇住啲新人，我就覺得自己似個爸爸，有時都會有啲嘢提醒佢哋，因為我做新人嗰陣，有邊個DJ冇鬧過我呀？阿Y（黃偉文）、森美、林海峰，佢哋個個都曾經剷到我飛出宇宙啦！」

又例如置業。「我成三十三、四歲人先肯買樓，其實我之前有錢買o架，但我成日都有個concept係：如果有一日，我搵唔到錢供樓，咁我點算呀？所以我先唔敢買。跟住有日，阿占就無啦啦同我講：『Hey，你供唔到嘅時候，你咪賣咗佢，咁你咪可以攞番你供嗰啲錢囉！』等我仲一直都以為，供唔到層樓，就會畀人收呀！哈哈哈！好白癡呀！」

至於其他投資，更加唔使諗。「嘩！我咁辛苦先搵到啲錢，仲叫我去投資？我唔夠膽囉。」

與Do姐主持《口水多過浪花》，Donald一直都扮演下把角色，負責搞笑。

有保障

Donald今年一月中時踏入四十歲後，對於自己的人生，他計劃得更仔細周詳，猶幸他是個典型的山羊座，多年來都有儲蓄的習慣。「我有兩個戶口，一個係用嚟日常生活開支，一個只係入錢落去唔會郁。我唔介意話畀人知，我係儲咗好多好多錢o架。」幾多先？「嗯……」他的眼珠碌了碌。「總之好多啦！」

他坦言，和前組合Krusty成員阿Jan張詠恩拍拖六年，至一一年五月才結婚，都是基於錢。「其實我可以更早之前就同佢求婚o架啦，但嗰陣我買完樓冇耐，未儲到一大嚿錢，咁點求呢？」

拍檔少爺占快將做老竇，Donald說，其實自己也心癢癢想有小朋友的，然而錢和時間都是問題。「結咗婚，我老婆想即刻生仔，但佢做咗時裝公關之後，仲忙過我，即係每一次想嘅時候，大家都未協調到……唉，好難解釋呀！哈哈！

「第二、結婚嗰陣已經使咗一大嚿錢，而且我成日都有個諗法係：如果我突然間死咗，咁我老婆點呢？所以我要儲定好大嚿錢囉！衰啲講，如果我突然間生咗仔，你叫我點搵啲名校畀佢？同埋我唔想因為擔憂錢，而將呢啲feel傳染到畀佢，咁我不如真係搵咗好大嚿錢、有個back up先啦，我唔使煩呢樣嘢嘅時候，個細路就可以開開心心嘛。

「總之我係好深信，亦都picture到，我係會（當父親）嘅！」

都說他不止得無聊和搞笑。

與阿Jan一一年結婚，Donald說丈夫的身份令他多了顧家的責任感。「隻婚戒真係好大威力！」

他是一名跑手

跑步是Donald在整個訪問中，經常掛在口邊的話題，甚至提議「不如我成個訪問都係講跑步呀！」

數年前，他因為艾粒一個活動要除衫拍照，方醒覺自己很肥。「跟住我就用咗兩個禮拜時間落街跑，又試過喺屋企原步跑咗半粒鐘，諗起都覺得自己戇居！」直至兩年前，他獲一個運動品牌邀請到山頂跑，「跑之前有四個星期的訓練，我就開始鍾意咗跑步，個活動完咗，大家仲繼續keep住跑，就係咁跑到o依家。

「跑咗步之後，我發覺工作唔係人生最緊要或最大嘅事。以前會喺工作攞到滿足感，但o依家跑步都得！」

二月中，他（黑衣左二）與跑步隊友齊齊參加渣打馬拉松半馬賽事，最後跑得一小時五十五分的成績。

他是一名貪靚鬼

四十歲，我讚他猶幸擁有一張童顏，歲月看來還未催人。「唔係o架都，我都有啲皺紋o架！我開頭都唔係好慣，不過o依家都OK囉！好彩我有做facial囉！」

吓？做facial？「梗係要做啦！我三十歲已經開始做o架啦，係關智斌教我做o架，嗰陣佢送咗某個牌子護膚品畀我，仲提我：『男人最緊要唔好畀人見到啲乜嘢呀？係頸紋呀！』咁我咪記住囉！我o依家睇番十年前嘅相，我係有少少唔同咗嘅，我好confirm嗰陣塊面係firm啲囉！哈哈！」

為了靚靚，他會不定時到美容院做facial keep住青春。「做得呢行，就要keepo架啦！除非唔做嘅啫。不過我呢排都少落去（美容院），因為去到要派利是，我唔想去。哈哈！」