顏卓靈升呢OMG
OMG即「Oh！My God！」，有驚訝、驚喜含意，用來形容顏卓靈（Cherry）有份角逐《第50屆金馬獎》「影后」的心情，100%貼切。「我知道入圍嘅時候，個人暈暈哋。之後嗰幾晚瞓覺，半夜都扎醒，仲緊張過考試。」十九歲的她，仍未算全職演員，顏卓靈在浸大正攻讀英國語言及文學二年級。訪問期間，她不下十次的強調自己「好鍾意演戲」、「好鍾意讀書」，這個心態，在她憑《狂舞派》升呢後仍未改變。「我唔想因為拍戲而走堂，要畢咗業我先會做full-time演員。」訪問這天，顏卓靈不用穿起dancing shoes，手執氫氣球，也可興奮起舞。
狂舞闖金馬
一部《狂舞派》，令顏卓靈有機會與高手如出爐「影后」章子怡、舒淇、鄭秀文及桂綸鎂角逐名銜，出發前她已表示有相當壓力；人在金馬獎會場，壓力仍在，但她也樂天地表示：「當作是學習的機會，看看為電影付出的前輩。」對於十二月底才滿二十歲的女孩子來說，實在是超級襟撈。
我等咗兩年先確定《狂舞派》拍得成，拍嘅時候導演（黃修平）會叫我準備呢樣、準備嗰樣，搞到我連瞓覺都諗住拍戲嘅嘢，成日好似冇瞓過咁。不過，要做就做到最盡，o依家有得提名金馬獎「影后」，我已經當贏咗。
《狂舞派》令顏卓靈與戲中拍檔Baby John成影壇新星。
收到提名通知嘅時候，我同媽咪喺尖沙咀行緊街，本來諗住買對舒服啲嘅鞋，一聽到有份提名，我成個人好懵，根本唔知發生緊咩事，要媽咪帶我去公園坐低先平靜到自己。
不用特別留意，眼前的顏卓靈跟電影中的「阿花」沒太大分別，爽朗的聲線和豐富的肢體語言，加上其標記爆牙，並不似在大學主修英國文學的書呆子。
我仲有好多科目要讀o架，好似PE（體育）咁，因為拍《狂舞派》要學太極，我PE都揀咗太極應考，報咗先知一啲都唔簡單。最易係practical考耍24式太極，筆試要用英文考，我就要用英文字寫一啲太極嘅理論，好似抱拳姿態，我記得我寫過其中一個原因係因為People come from five seas and four lakes（五湖四海）。哈哈！
