政黨急搶位 馮煒光做ＩＣ露玄機

新聞統籌專員（IC）一職懸空三個幾月，最近有消息傳出，政府可能在兩周內公布人選，而馮煒光仍然係大熱。不過佢老父本周日因久病過身，令佢無晒心機處理其他事。記者致電慰問他時，佢話心情好沉重，目前全心辦理父親喪事，不願多談其他。

馮煒光早前回應傳媒就新聞統籌專員查詢時，曾爆出「三個字：不予置評」的笑話，之後關於佢任命胎死腹中嘅消息即不脛而走。不過，有同馮煒光相熟的公關界老友早前問過佢，當時馮胸有成竹說：「大家唔使咁心急，兩、三星期內有公布啦！」語氣淡定，好似暗示已坐定粒六。

「馮大帥」是否坐正IC位，政府兩星期內應有公布，但他人未走，各政黨已虎視眈眈他的區議會空缺。

新民黨在南區經營多年，該黨主席葉劉淑儀最近空降新兵陳家珮到海怡，準備搶馮煒光的議席。（羅蘭蓉攝）

本刊察覺政黨在地區有不少異動，似乎空穴來風未必無因。據透露，馮煒光近排喺南區區議會工作放慢晒手腳，唔止少咗落區，上星期區議會例會更加冇出席；而對政府消息掌握得好貼的新民黨主席葉太，最近急調一名女將頻頻落區拉定票，好似當馮煒光已辭職，搶先喺地區做緊補選部署。而民主黨亦進行「光復行動」，準備派最重磅的單仲偕落南區「光復」叛將馮煒光的地盤。

另一個迹象係，馮煒光一直係自己創辦的靈思公共關係嘅董事，但查冊資料顯示，佢十月三日正式辭去呢個職務，交畀細佬馮煒航負責，自己生意都劃清界線，似為方便加入政府。

馮煒光入局與否好快揭盅，不過公關界人士就講咗一單馮公子早年嘅笑話，話說佢早年出身公關大行博雅（Burson Marsteller），喺行內做好多公共事務生意，馮煒光當年喺度學師，有個花名叫「馮大帥」，英文名叫General Fung，笑佢無論大小project，下下都搞到好似領導緊千軍萬馬打大仗咁，旁人看着都相當滴汗。

馮大帥學滿師後，自己出來搞靈思公關，規模好細，不過，由於佢專做國內中小民企order，據講顧問收費亦係行內出名夠平，生意密密執，都畀佢執唔少，買波子、洋樓對佢來講綽綽有餘。