真心戰警
講典型嘅香港警匪片,一定唔可以唔提羅守耀導演。最近羅導演有新作《衝鋒戰警》即將上映,我梗係要誠邀佢擔任「Paco巨星飯堂」嘅嘉賓,同我一齊傾吓電影經。
羅導演真心製作心血結晶,今晚仲率領新作演員李璨琛(Sam)、鄭麗莎(Lisa)、李曼筠(Maggie)同陳靜儀(Mia)赴會,我亦精心挑選位於山林道嘅「井橋日本料理」,與五位嘉賓歎住特色日本料理,暢談拍攝《戰警》嘅點滴。
今晚我同Maggie、Mia、羅導演、Lisa同阿Sam,去到位於山林道嘅「井橋」品嘗日本料理,大談電影經。
主戰寫實
一如以往,羅導演亦身兼編劇一職,由籌備至拍竣,足足花上一年時間,「我有唔少做警察嘅朋友,寫劇本要做好多嘅資料搜集。我想拍一部地道嘅典型香港警匪片,但係有好多題材都已經畀人拍過,於是一邊做research一邊諗,以一個『車頭』作為故事主角。
「『車頭』即係警隊嘅警署運輸車輛警長,主要係安排警車、司機出勤同警車維修,係警隊入面鮮有嘅朝九晚五職位。好多人都唔知警隊有呢個職位,因為好多人都覺得警察成日要衝鋒陷陣;戲中嘅華哥(任達華)就飾演呢個角色。」
羅導演對警匪題材情有獨鍾,仲次次都全情投入製作。
羅導演話,構思劇本嘅時候,已經認為華哥同邵美琪係男女主角嘅不二之選。「我一直都有同兩位演員合作,建立咗一定嘅默契,華哥同Maggie都係專業嘅演員,亦好適合戲入面嘅角色,最唔啱市場嘅可能係我冇安排感情戲畀佢哋啦!」
哈哈哈!既然劇情冇需要,導演亦唔會胡亂加插,佢反而話欣賞華哥嘅搏命演出:「有場戲要華哥由八樓跳到六樓,要佢追個賊,拍之前我已經安排晒替身,但係華哥話要有職業道德,所以決定自己跳。」
黑豚肉無花果沙律($68),開胃醒神。
活魚薄切刺身拼盤($680),除活魚刺身外尚有包括海膽、帶子、牡丹蝦等刺身,物超所值。
牛油果軟殼蟹卷($58),外形味道兼備。
火花四濺
除咗親情、友情,動作部分係電影嘅另一主打,華哥之外,其實阿Sam同Lisa亦都分擔咗一啲動作場面。阿Sam雖然喺戲中飾演賊人,但係跳樓亦有預佢一份,「我要喺三樓跳落地下,好耐冇拍過跳樓戲,就算明知有威吔都有啲壓力,正式埋位之前我都企喺嗰度九分鐘,感受吓個高度,畀啲心理準備自己。
「以前我細個唔畏高,唔知點解結咗婚之後就畏高嘞!好彩導演唔使我係咁跳,跳幾次都收咗貨。」
Lisa(中)同阿Sam(右)異口同聲大讚導演(左),話有佢令拍攝流暢好多。
阿Sam話成家後忽然畏高,哈哈哈!責任大咗,專業得嚟都要小心為上。
至於Lisa就負責武打,對手係飾演警察嘅林雪,「雖然雪哥身形比較巨型,但打起上嚟都好敏捷,其中一場戲講我同佢喺車立入面對打,因為空間有限,所以都拍咗兩日。
「之前我嘅夢想係做一個動作演員,o依家有羅導演畀呢個機會我踏出多一步,咁我自然會全力以赴啦!」
松葉蟹($338)正值當造,肉質鮮甜!
煙肉青瓜沙律($58),既清新又juicy。
造就新血
除咗資深嘅名牌演員,羅導演亦有選用新血如Maggie同Mia,畀機會佢哋向前輩取經。其中Maggie就飾演新紮師妹,「喺戲入面我同華哥嘅對手戲較多,佢好nice,教我唔好死記劇本,因為咁樣就唔夠自然,所以我睇劇本會記重點,然後隨住對手變化,咁先同華哥有交流。」
我與一眾嘉賓,跟老闆娘Moon(右二)同老闆威哥(右一)合照留念。
Maggie話跟華哥學到演戲竅門。
睇到華哥瞓身演出,Mia都不敢怠慢。
而Mia喺戲中飾演愛蒲辣妹,唔係得華哥出手相救就有被強姦之險,「劇情講華哥因為救我而畀人圍毆,仲要從二十呎高撻落街。我見到佢咁pro,喺拍攝期間我都叫飾演想強姦我嘅武師唔使咁怕醜,放膽啲做,唔係拍出嚟嘅效果就唔夠自然。」
電影嘅台前幕後一心製作好電影,我就喺度預祝《衝鋒戰警》創佳績!乾!