「深切檢討論」失分 林煥光被圍攻
免費電視牌照風波未有平息迹象，行政會議召集人林煥光本周日出席公開活動時，再有驚人言論，公開呼籲特首梁振英要「深切檢討」發牌過程，政圈嘩然，一眾行會成員亦相當尷尬。
林煥光入行會後，已多次語不驚人死不休，喺發牌風波上，林煥光將責任推落特首梁振英身上已非首次，佢最初回應係「行會已經盡最大能力向政府建議，但最終由特首拍板」，講到好似唔關自己事。當時政界已有聲音，話佢作為行會召集人，咁樣劃清界線似乎唔太恰當；事實上行政會議涉及不少具爭議性的議題，沒有可能人人都同意，會內激辯過後，行政長官都要扮演拍板的角色，如果人人都將責任放到特首身上，又點叫做集體負責制？
本月初林煥光一度改口風，話發電視牌唔同開茶餐廳，唔係話畀就畀；但到了本周日，他又再扭番轉頭。
港視發牌風波未燒完，林煥光身為行會召集人，冇去撲火頭，發表言論反而將問題愈燒愈大。
政圈一直有傳林煥光支持發三個牌，有人代佢辯解，話佢咁講可能只係反映佢對發牌有不同意見，畀市民鬧係「食死貓」。不過林煥光這種左扭右扭的抽水大法，四面失分之餘，左中右陣營都圍攻佢。
有行會成員透露，佢哋逢周一都有非正式聚會，預備星期二例會要傾嘅課題。本周一就有行會中人在聚會中當面力數林煥光，認為有唔同意見可以內部直接同特首反映，唔使吓吓公開回應。該行會中人仲話，做行會召集人可能好大壓力，但一班循直選入立法會，再被委任入行會嘅成員壓力咪仲大，佢哋都要頂住，點解林煥光咁錫身？
據講，林煥光被同僚圍攻完一輪都急急「耍冧」，話明白自己嘅說話令特首同行會尷尬。
有建制陣營大佬向本刊狂呻，話發牌過程的確有檢討空間，事實上建制內亦唔只林煥光有不同意見，只是用到「深切檢討」四個字語氣太重，完全冇彎轉，「佢坐住個位，就應知所進退，咁怕火燒身，是否還要再擔當行會召集人這個重任？如果佢請辭，咁就海闊天空任佢講。」
建制派圍插，泛民內亦唔見得有人同情佢，有泛民大佬輩話，o依家至出來講有乜用？覺得林煥光立場忽左忽右，一時攬特首，一時又走出來插特首，「左穿右插，最終變咗進退失據！」
