江美儀Fans多過吳卓羲
東姑做咗娛記十幾年，見盡娛圈百態，一個藝人紅唔紅，你睇佢出席完公開活動，有幾多fans圍住就一目了然。好似話講到吳卓羲係一線小生，但日前佢同江美儀一齊出席一個《衝上雲霄Ⅱ》嘅宣傳活動，一出酒店嗰吓，高低立見。呢邊廂，江美儀即刻有成十幾廿個fans圍住，氣勢何其壯觀；至於嗰邊廂，吳卓羲就只得小貓三丁，所以話好多嘢係唔可以淨係睇表面嘅。
鬼咩，吳卓羲近年成日上內地拍戲，冇理香港啲fans，又經常傳緋聞，形象大打折扣，fans自然流失啦！
江美儀雖然不再年輕，但仍然美艷，佢同馬國明喺《衝上雲霄II》就大搞姊弟戀，不過就畀網友嘲諷係婆孫戀。
估唔到四十一歲嘅江美儀，竟然有一大批年輕fans，佢受歡迎過好多靚女呀。
