唱彈弘圖 鄭俊弘
戲如人生。命運，有時就如電影《雲圖》般，錯綜複雜，九彩咁亂。「我比較簡單，演戲、上台唱歌，都係我鍾意做嘅事。參加《星夢傳奇》，都係為咗畀人知道，我叫鄭俊弘。」結果，鄭俊弘就成為節目的「高分王」，一炮而紅。「都唔知會last幾耐。」自潑冷水，因為鄭俊弘的命運不如其本座簡單，由加拿大返港，為了唱歌；唱片公司倒閉，輾轉成了演員；當了十年路人甲乙丙，夢想卑微到只是「叫你認清楚我」；別人認得了他，鄭俊弘只天真（堅天真！）地說：「可以唱落去，畀我玩耐啲就得o架嘞！」廿九歲，來日方長，茄喱啡不是宿命。鄭俊弘把握人生高峰，拿起伴隨多年的人手製結他，自彈自唱，一臉滿足。人生可以簡單，也是福氣。
非鹹魚
愚昧觀眾角度上，所謂《星夢傳奇》是電視台把二、三、四、五……等線演員物盡其用的環保節目，然而環保也造就平地一聲雷，眼前的鄭俊弘，是「雷霸」。置身band房，他坐在爵士鼓前，應本人要求激情擊鼓，完全為視覺效果考慮。眼見他愈打愈起勁，我心多，總認為主角正擊出捱了十二年的怒氣。
「唔係，我有同朋友夾開band，識少少打鼓，咁先打到個rhythm（節奏）。呢十年嚟，我都係想有人認得我，叫得出我個名。係，《星夢》幫到我達成呢個夢想，頭先行過嚟嘅時候，有人會好熱情咁同我打招呼、叫我影合照，我好grateful，但係我唔知呢個trend會維持幾耐。
上月廿七日，鄭俊弘（左）任巫啟賢（右）演唱會嘉賓，並拜巫為師，他自言「賺咗」。
「o依家我每日起身，都要reload番啲片段，問自己：『係咪真嘅呢？』，去肯定我唔係發緊夢。《星夢》係一個dream comes true，我可以唱番歌、聽到評判讚我，已經好感動。」
打鼓的怒氣，忽然變成朝氣，鄭俊弘入行非以大紅為目標，只以唱歌為夢想。不做鹹魚耐心等待，終等到一個機會，圓夢又成了巫啟賢的徒弟，他繼續心存感激，繼續為夢想而戰，「嚟緊我嘅事業有唱歌呢部分，就已經好好嘞！」
○一年，十七歲（右）參加《新秀》獲亞軍，當年冠軍為何晶晶（左），仍未能成名。
一三年，廿九歲，參加《星夢》成「高分王」，一舉成名。
屢次夢碎
夢想，不一定要大想頭，於溫哥華土生土長的鄭俊弘，夢想也來得踏實，細有細做。十一月才三十歲的他，訪問中強調自己「廿九歲嘞！」，轉頭又說：「Thirty is the new twenty」，正能量補給快得可以，跟他屢次與夢想擦身而過，慣了「拿起」、「放下」，不無關係。
「細佬王」（右）的家姐包括蒙嘉慧（中），而提拔鄭俊弘的梅小菁，一一年還力薦他成無綫「親生仔」。
「喺加拿大，華人係興學武術，好想搵番自己嘅根咁，所以我六歲已經學蔡李佛，到十二、三歲就學埋國術，我一直都好想好似我師傅咁，入加拿大武術國家隊。喺我十五歲，仲未超齡參加選拔賽嘅時候，就因為自己貪玩打空翻，整斷咗右腳ankle（腳踭），冇得參加選拔賽。」
失落一號夢想，造就二號的成形。「右腳打咗石膏，我就拎起結他，自彈自唱，就喺呢個時候，音樂、唱歌變咗我新嘅夢想。可能因為咁，o依家我彈結他嘅時候，都係揼左腳o架！哈哈！
「到十七歲返香港參加《新秀》贏咗亞軍簽咗『華星』。嗰時公司仲有梁漢文、何韻詩同古天樂，我真係覺得夢想成真，仲幻想自己出碟、去紅館開show，點知唔到兩個月，『華星』就冇咗。」
鄭俊弘由外公、外婆帶大，他與外公關係密切，談及已離世的外公，他仍一臉哀傷。
鄭俊弘十一歲便成了卑斯省武術冠軍，後因貪玩而錯失入國家隊的機會，才轉而追尋音樂夢。
細佬王
低處未算低，令原本雄心萬丈的鄭俊弘跌至谷底，「嗰時仲細，差唔多日日都喊，而且唔知點做先好，日日都渾渾噩噩。到半年之後，TVB打電話畀我，叫我參加第十八期藝員訓練班，同班仲有胡定欣、黎諾懿。
「入到訓練班，三個月上堂，三個月實習，第一個角色係《帝女花》（主角為馬浚偉）入面嘅一條死屍。做咗一年幾，先有第一句對白講，嗰句對白應該係『唔該』。」
飾演過路人甲、同事乙、學生丙，○四年鄭俊弘得到前無綫監製梅小菁賞識，在《法證先鋒》系列中飾演蒙嘉慧弟弟，從此開始了他的「細佬之路」，即在不同劇中飾演主角弟弟。「我有諗過，係唔係我個樣太young，所以做嘅角色有局限，都係做人哋細佬？團火慢慢冇咗。
「Family」並肩同行，跟汽車維修員有士巴那跟身一樣，是理所當然的事，但口罩呢？保重呀Leslie。
「拍完《法證2》，有半年冇人搵我拍劇，我就成個人冇晒方向，跟住就請假返加拿大探媽媽。返到去，媽媽叫我返去做警察，我同佢講：『我OK嘅，我一定得嘅！』，嗰時係○七、○八年，我喺溫哥華報咗一個戲劇課程，喺入面學識番演戲係art，唔係為咗開工、爭角色，好似點番着心入面團火咁。」
藝術家通常連餬口也成問題，鄭俊弘亦不例外，「戶口得番五十蚊，㩒機又㩒唔到出嚟，有時會問家姐借一百蚊，然後三餐都食麵包。」
初嘗走紅滋味的今天，如訪問當日，鄭俊弘忙於工作，接受訪問而沒時間進餐，他淡然說：「我袋入面有麵包，OKo架！」
係屋企人
「救命包」也不及鄭俊弘契爺秦沛的一番話，「咁多年，真係最感激Paul哥，我哋喺《心花放》飾演父子，平時佢都當我半個仔咁，每次收工都車埋我。我有咩都會同佢講，佢講過：『做呢行，要學識等。冇捷徑，要keep住你嘅狀態。你一定得嘅，爭在你肯唔肯等o架啫。』
「我成日都諗住佢呢番說話。等，好簡單啫，o依家？我都未知係咪真係等到，都係諗住have fun，要enjoy每一日。」
提秦沛，必然要提其女兼鄭俊弘緋聞女友姜麗文，有指二人奉高層之命，要發展地下情，當事人聞言只表示：「係family，我哋係best friend，喺溫哥華我已經識Benji（姜文杰）同Leslie，我同Paul哥一家都成日一齊食飯嘅。」
秦沛（右）和姜麗文（左）都是鄭俊弘（中）口中的「Family」。
有運到
後記這一頁，本人習以為常地，都會請受訪者「懶係嘢」地拍一款照片。這一幀，老土的標題應該是「從黑暗中走過來」。鄭俊弘一看，笑說：「哈！有啲《American Psycho》（美色殺人狂）feel喎！」唔該晒！但是日psycho（精神病患者）欠奉，我又心多，只聯想到cycle。
循環者，不息也，正如命運。沒有宗教信仰的鄭俊弘，等了多年也有請教高人許文喜。道聽途說，鄭先生的命，正開始步入廿五年大運。本欄不導人迷信，但寧可信其有，鄭俊弘由等運到至真的有運到，是循環，也是「從黑暗中走過來」。
