招積聰專衝解放軍
周日旺角兩陣營劍拔弩張,一批「港英幫」循例殺到,其中一名成員招顯聰(下圖)更涉嫌企圖搶警槍,被幾個差人挾走,成為新聞焦點人物。
呢個瘦弱四眼仔,英文名叫Billy,曾入過社民連,其後加入網上組織「我哋係香港人,唔係中國人」,經常高舉港英旗上街遊行,衝擊差人,要求香港脫離大陸。其後組織分裂,Billy同另一成員Dickson另起小爐灶,名為「香港人優先」。
雖然山頭細細,但Billy仔搞作多多,而且更加出位,近期更以駐港解放軍為主要目標,早前就趁八.一建軍節,走去駐港解放軍總部外焚燒八.一軍旗。
呢種行動對解放軍係極度挑釁,泛民政黨都唔敢做,所以當日只有佢同民運人士楊匡、雷玉蓮及古思堯等四、五人,可見「自己友」亦覺生人勿近。
據了解,Billy仔日後仍有類似搞作,由於佢實在太麻煩,所以周日受到警方特別「招呼」!