人生有幾多個十年？這一個十年，大家等到《衝上雲霄Ⅱ》，而再演續集的上集演員不多，吳卓羲是其中之一。他於二千年入行，短短兩年便獲演出《衝上雲霄》機會，劇集翌年播出。伴隨劇集成功，這位新人霎時走紅。

「唔係叫上位，叫畀人認識多啲，點解會走條o靚仔叫吳卓羲出嚟嘅呢？認識吳卓羲嘅大部分都係因為《衝上雲霄》，梗係希望有第二集啦！我對收視幾有信心，如果收視好嘅梗希望有第三集啦，不過唔好等十年！」

其後十年，吳卓羲遇上過甚麼好事壞事韻事，庶民如我，總能侃侃而談，舉一反三，同時也不得不讚歎吳卓羲的硬淨，和對無綫這個僱主的忠心耿耿。

「入咗呢行點轉行吖？唔通叫我走去做地產咩！我呢啲一入侯門深似海！」

海有幾深或許無人能肯定，然而能活於這深海的，泳術必定精湛，吳卓羲實是其中一人。

幾番新人事

十年後的續集，相比第一集的分別可大了。S4減掉了陳鍵鋒、黃宗澤，在續集餘下馬國明、吳卓羲的S2。

「過咗十年有冇唔同？老咗！冇o架喇，唔通我為咗《衝上雲霄》整番後生啲咩？打多幾支針咁咩？拍出嚟係舒服咪得囉。好想有番S4，但冇辦法，所以加入新角色，對觀眾係一件好事，係一個話題，你睇吓Cool魔！」

吳卓羲承認，他飾演的唐亦風需連貫上集角色性格，張智霖的加入，無疑比自己搶鏡。

「我唔能夠一出到嚟變咗另一個人，除非好似杏兒咁演另一個人啫！我同鎮宇哥傾過，大家都冇得點轉變，除咗揸飛機上比起上集成熟。我幾鍾意今次劇本，以前點會講『朱古力味嘅屎，屎味嘅朱古力』，幾切合呢個時代。同埋又大膽咗，咁多美女咁sexy喎！全部畀晒馬明、Chilam去處理，幾新鮮！」

在上一集，一個初出茅廬的小子，面對資深的吳鎮宇，更要飾演不時窒他、寸他的弟弟，吳卓羲怯到不得了。

香港收視麻麻的《大唐雙龍傳》，替吳卓羲開拓甜美的內地市場。

「第一個禮拜走去拍嘅時候覺得，死啦同吳鎮宇拍喎，都會驚，但佢係大哥哥會睇住啲小朋友，唔會令我哋好怯場，如果我哋演得唔好都會影響到佢，惟有舒服地去演，諗得太多一定唔會夠佢嚟，個心態上要話畀自己聽要放膽，唔好理佢，完全當佢係我阿哥。」

吳卓羲自言演技進步不少，今次和影帝的合作已達另一層次，對方更十分尊重自己的演繹取向，任由發揮。

「拎住劇本唔通仲呀……呀……咩？畀佢鬧到七彩啦！依家關係係朋友，大家喺香港一得閒就會約食飯。十年前佢睬你都傻啦，約佢出嚟食飯？扒兩啖佢就走o架啦！」

「有好多戲想令觀眾溫故知新，所以屋企戲就係我哋四個一齊等觀眾諗番起我哋第一輯嘅嘢，好開心嘅。」

銅皮鐵骨

要數吳卓羲的代表作，《酒店風雲》、《學警》系列、甚至《女王辦公室》的宅男角色，順手拈來。

「我就覺得係《大唐雙龍傳》，喺大陸市場幾重要，喺大陸賣碟、賣帶、同埋收視之冠，香港收視就唔係咁好嘅，但就畀到大陸人認識我。」

祖國大地當然好，要說是遍地黃金也不算誇張。「內地梗係金錢上、時間上好，你有休息時間咩都會舒服啲。佢哋明文規定每個演員都要簽時間，女主角可能簽咗十二個鐘，佢收工我冇理由繼續拍吖，我就會簽十四個鐘嘅，因為我畀嘅日數少啲，喺TVB起碼都十九、二十個鐘啦。」

他在TVB的紀錄是五天沒有睡。

十年前，和一班前輩合作，吳卓羲當然要靠邊站。

「直情成個人懵o架，得個軀殼，對白又講唔到。但以前做新人，我唔拍就下一位，next！咁就冇o架喇，硬住頭皮拍到喊住都要拍。其實冇瞓覺嗰陣時邊諗前途呀？我淨係諗住張牀褥，劇本都記唔到何來諗理想？當時我最大夢想係希望有一個孖生嘅，一模一樣嘅我幫我頂住外景，我就拍廠！」

其實吳卓羲衷心感謝工作日程不是人咁品的TVB。

「一路以嚟個習俗都係咁樣，梁朝偉劉德華都係咁樣出嚟，我覺得對我哋嚟講係一個幾好訓練，拍完TVB你去到邊度都冇問題。」

在這個機構十多年，吳卓羲相信緣份。

「同經理人係緣份，咁多劇嘅監製搵你、畀啲好好嘅角色你都係一個緣份，又算係叫伯樂。一齊拍《衝上雲霄》嘅吳鎮宇係咪伯樂？必定係！帶我入行嘅嗰啲都係伯樂嚟。」

第一輯《衝上雲霄》的S4也接受過《東周刊》訪問，沒有包頭巾的吳卓羲巧妙地鶴立雞群。

不可不信緣

在人生每一階段遇上的每一位，都是緣份。傳緋聞、甚至真正相愛過的異性，也不能不認是緣份吧。

「緋聞嘅嘢我覺得當宣傳，每一部電視劇總會有啲。咪傳囉，我都不作理會。」

吳卓羲曾公開表示和張馨予「大家愛大家」，現在單身。

「媒體標榜artiste拍拖係一件奇怪嘅事，根本就唔奇怪，大家都係人嚟，有情感，有愛情、親情、友情。你話會唔會好似林峯咁樣（公開戀情）？可能有一日會係咁，但依家我唔需要諗呢樣嘢，拍拖都冇乜意思，因為我成日都唔喺香港。女朋友要陪o架嘛！

「我覺得男人冇乜所謂，啲人成日問，會唔會好似邊個邊個咁生兒育女呀、拍拖會唔會公開……我都要睇時機，同埋都要有對象先得o架！唔會立亂拖個出嚟話：『喂我女朋友，得唔得呀？』冇理由o架嘛！

入行四年便能奪得「我最喜愛的飛躍進步男藝員」，證明吳卓羲沒有入錯行。

現在絕對沒有機會再見到的畫面。

「我覺得成家立室需要嘅對象，你有心搵必定搵到。如果有個家，係咪要令屋企人舒服呢？所以我要喺金錢上令到家人舒服，暫時年紀話細唔細，話大唔大，我覺得三十零歲，仲可以繼續拼。

「第時老婆唔好唔做嘢，百無聊賴！我個人唔係咁鍾意人哋黐住我，想有自己空間多啲，見當然冇問題，但唔好廿四小時呀！」

既為凡夫俗子，總有為瑣事動氣之時，身為藝人，壓力更是不為外人道，幸好吳卓羲懂得找依靠。

「我信觀音嘅，請個觀音返屋企，自己望住佢又舒服啲，諗嘢又冇咁暴戾，冇咁易發脾氣，心理上有個依靠。

「啱啱入行嗰陣成日冇得瞓，太過疲累就容易火爆，呢樣唔啱嗰樣唔啱，又會同人哋抱不平，間接令脾氣差咗，信仰令我冇咁易發脾氣，人大咗EQ又高咗，好少愈老愈火爆。咩叫年少氣盛啫？」吳卓羲一邊撥弄放在桌上那部傷痕纍纍的黑色iPhone 5，一邊那樣說。

當年張馨予嚇了大家一跳的畫面。

從此蕭郎是路人

吳卓羲已不是新人，擔正過不少劇集，然而在《衝上雲霄Ⅱ》中有吳鎮宇、張智霖等前輩級人馬，他不得不返回二線，當唐亦琛弟弟，在家中佻佻皮皮，在飛機上又被Cool魔訕笑。

「冇一樣嘢係有得強求，想做主角，但冇理由搶咗吳鎮宇個位o架！冇得話喂我要做就有得做，未夠資格！都係聽從監製發落。公司畀咩角色，當然你就要演。公司都唔會太難為嘅，唔會突然間畀個路人甲你嘅。」

最近他被傳搭上同劇的傅嘉莉，縱然兩人在劇中有感情線，但吳卓羲回應說，女方指是記者歪曲事實，自己無論以前、今日、將來都沒有可能跟她拍拖。當公眾人物，就是這麼容易被擺布。

「唔係話自己咩明星，出街都會驚後面有人跟住，出去食個飯啫，大佬我做娛樂圈，唔係做賊喎！冇咗呢個自由，不過又可以攞番你鍾意娛樂圈嗰啲嘢，可以享受拍戲，部劇成功，亦有成就感。」

娛樂圈的深海就是如此，無時無刻也會成為主角。吳卓羲要做的，就是在這海上繼續游弋。要自由還是成就，相信在吳卓羲心目中，自有解答。

和傅嘉莉的緋聞，吳卓羲已不想多提，決絕地劃清界線。